amalinks wokungena

Breaking News

Abantu Bakhuthazwa Ukuba Bangahambi Ezimfeni Okumemetheka Kakhulu Igciwane leCOVID-19


Abantu abafika phose amatshumi ayisikhombisa – 68 babulewe ngumkhuhlane weCOVID-19 eZimbabwe izolo kwathi abedlula kancance inkulungwane lamakhulu amane – 1,445 bahlolwe batholakala belomkhuhlane weCoronavirus.

Uhlangothi lwezempilakahle luthi sokulabantu abedlula inkulungwane ezimbili lengxenye – 2,588 asebebulewe ngumkhuhlane weCOVID-19 elizweni kusukela ngoMbimbitho nyakenye.

Luthi sokulabantu abedlula isigidi – 1,132,045 asebehlatshwe okwakuqala ijekiseni yokuzivikela kumkhuhlane weCOVID-19.

USikhwicamfundo Solwayo Ngwenya, osebenza esibhedlela seMpilo Hospital, uthi umkhuhlane lo umemetheka ngamandla ngenxa yokuthi abantu kabalandeli abakutshelwa nguhulumende labezempilakahle.

UNgwenya uthi akumelanga abantu behambe ezimfeni.

Abantu abanengi bathi kuyethusa okwenzakala eZimbabwe lapho omemetheka ngamandla umkhuhlane weCOVID-19.

UMnu. Ambrose Sibindi, umgcinisihlalo wenhlanganiso yeBulawayo Progressive Residents’ Association, uthi kumele abantu baqaphele umkhuhlane lo.

Uhlangothi lwezempilakahle luthi abantu abedlula inkulungwane ezingamatshumi ayisificaminwe mibili - 82,613 sebahlolwa batholakala bele COVID-19 kwaphephe abazinkulungwane ezingamatshumi amahlanu.

Uhulumende ukhangelelwe ukuba uzathenga amajekiseni okuvikela uzulu kumkhuhlane lo ayisilinganiso sokungama doses afika izigidi ezintathu lengxenye – 3,5 million kusiyaphela uNtulikazi.

Facebook Forum

XS
SM
MD
LG