amalinks wokungena

Breaking News

Abantu Bapha Imibono Yabo Ngokumiswa Umsebenzi KwamaKhansila eHarare


Harare City Council
Harare City Council

Uzulu weHarare kanye labenhlanganiso ezisebenzisana lozulu uyakusola okwamagama, ukumiswa umsebenzi kwamaKhansila aleli dolobho, besithi kuzophazamisa ukusebenza kuhle kukaManisiphala kanye lokumelwa kukazulu kwezombusazwe ngasikhathi sinye abeZanu PF sebevele sebekhankasela ukuba kubunjwe iCommission ezaqhuba umsebenzi wekhansili kulungiselelwa ukhetho.

Lokhu kuza ngesikhathi umphathintambo wezabelo emise amaKhansila alitshumi lambili -12, aweHarare kulandela isicelo sabeMDC- T, ekhokhelwa nguNkosazana Thokozani Khuphe.

Isikhulumeli senhlanganiso ye Crisis In Zimbabwe Coalition umnumzana Marvelous Khumalo uthi leli nyathelo alibajabulisi ngitsho lakancane ngoba kungelani lendingeko zikazulu kuyikulwisana kwenkokheli emabandleni ezombusazwe, kubangwa izikhundla lamathuba.

“Lokhu thina siyadana lakho kakhulu ngoba sasifisa ukuthi engxenye abakhokheli bethu bangalwela ukuthi impilakahle yethu ihambe kuhle. Kodwa khathesi sibona ukuthi konke lokhu okulwelwa ngabakhokheli bethu, akulani lenhlalakahle kazulu. Akubisi manzi empompini zethu, akubisi ukuthwalwa kwengcekeza, akubuyisi ukulungiswa kwe sewer, njalo akulancedo okulayo kumpilakahle kazulu.”

Osekusenzakala eHarare uKhumalo uthi yinto edanisayo kakhulu ngoba sokubuyisela muva imisebenzi yalelidolobho.

“Kungcono laba abalwisanayo bahlale phansi bazwisisane, bame konke lokhu okokumisa abantu abakhethwa nguzulu, ukuze bamelele uzulu. Ngoba khathesi sibona ukuthi lokho abayala bekuyenza kungacina sokusenza ukuthi kwamanye amaLocal authorities kucine sekulamaCommission. Yikho hayi, thina lokho asikuthakazeleli sifuna ukuthi abantu bamelelwe yilabo bantu ababakhethayo, hayikhona laba abamaCommission abayenzwa okokufakwa nguhulumende.”

Enye ingcwethi kwezombusazwe umnumzana Bekezela Maduma Fuzwayo laye ugcizelela kulumbono ethi akusisi ndawo njengamaZimbabwe.

“Lokhu kuzasibuyisela emuva kakhulu ngoba amaKhansili citshe wonke azaqala phansi kutsha and siphakathi kwesikhathi eside before ama election, sisase hafini. Kumele baphume, bonke sivele sibekwazi ukuthi sekuqaliswa kutsha ngoba sekungani yikudlala, ukubana asiyazi into esiyenzayo. Nxa kusehlula sibili, kabarizayine bonke baphume, kumbe iKhansili ifake amaCommission, kumbe kwenziwa ama By- Election, kuvele kuqaliswe kutsha.”

Umsekeli wesikhulumeli seMDC Alliance ekhokhelwa ngumnumzana Nelson Chamisa umnumzana Felix Galela Mafa uchaze labo abaxotshiweyo njengamaqhawe sibili ngoba bengazange bavume ukuthengwa ukuthi bahlamukele ibandla.

“Kungaba ngcono sixotshwe, kuzatshengisa ukuthi lina limi ngaphi labantu. Laba abazasala kuzatshengisa futhi ukuthi engxenye babhoda ngale bayakhuluma loMwonzora ebusuku njengo Nichodemus. Phumanini kuhle, sifuna i transparency, abantu abakhethwa yi MDC Alliance ngokusemthethweni, lingatshelwa ngama Judges a compromised. Sahamba saya kuNomination Court, i Nomination Court ifanana le High Court, yalungisa konke yathi iMDC-A, yi party esemthethweni.”

Kodwa isikhulumeli seMDC-T, umnumzana khaliphani Phugeni uthi uyabuzwisisa ubuhlungu uzulu alabo kulelinyathelo labo kodwa kumele uzulu azwisise ukuthi lakibo libuhlungu kodwa phela umthetho kumele ulandelwe.

“Ye, indaba yama Recalls vele ibuhlungu, lakithi ibuhlungu kodwa besizothini phela ma abantu bethi bona abasekho eqembini lethu. Umthetho uthi kumele siba rekhole, okungelanto ebe singayenza. Kubuhlungu kodwa hayi, siyabathembisa ukuthi indaba yeCommission ayizukwenzeka, ayizukwenzeka noma kanjani.”

Kusenjalo abe People’s Democratic Party Zimbabwe – PDP ekhokhelwa ngunkosikazi Lucia Matibenga, labo bathi sebemise umsebenzi amakhansila akubomanisipala abehlukeneyo elizweni okugoqela osanda kukhethwa ukuba nguMayor weHarare umnumzana Jacob Mafume.

Isikhulumeli ebandleni leli umnumzana Nqobizitha Khumalo uchasisa kabanzi ngalelinyathelo lebandla lakhe.

“Kuliqiniso, simise umsebenzi amalunga ePDP abe ngamaCouncillors kumaWards athize kweleZimbabwe. Lokhu kulandela umhlangano esiwenze eGweru ngoMgqibelo mhla ka 12 September 2020, lapho esivumelane khona ukuthi amalunga la kumele amiswe umsebenzi ngoba kasalandeli zingqumo zomhlangano we PDP. Okunengi kuzalandela, ngalesi sikhathi yikho lokho engilemvumo yokukukhuluma. Okunengi kuzabuya ngesikhathi esilandelayo kodwa ngifuna ukuchasisela kakhulu ukuthi lokhu kwenziwe ngemva komhlangano, kube le resolution ye National Council eGweru evumelane khonokho.”

AbeZanu PF bona sebehle beqinisa umkhankaso wabo wokuthi kudingwe iqula lama Commissioner azaqhuba umsebenzi emadolobheni lapho okwakhethwa khona amakhansila aweMDC Alliance ekhokhelwa nguMnu. Nelson Chamisa ngoba esehlulekile ukuqhuba umsebenzi.

Lokhe liqansa inani lamaKhansila asemisiwe umsebenzi emadolobheni ambalwa agoqela eMarondera, Victoria Falls, Gwanda, Harare lamanye.

Udaba lwamakhansila aweHarare siluphiwa nguMavis Gama
please wait

No media source currently available

0:00 0:06:34 0:00
XS
SM
MD
LG