amalinks wokungena

Breaking News

Abantu Bathandabuza Okwenziwa yiZimbabwe Anti-Corruption Commission


Baxoxa ngokungethembeki koBulawayo ...
Baxoxa ngokungethembeki koBulawayo ...

Abenhlanganiso zenhlangothi zempilo ezitshiyeneyo abakoBulawayo bahlangene ngoLwesine bexoxisana lokubonisana ngamacebo okuqedwa kwemikhuba emibi yenkohlakalo.

Uzulu uveze ukuthandabuza ngokusebenza okwenza ikhomishini ebona ngezenkohlakalo eyeZimbabwe Anti-Corruption Commission.

Umhlangano lo, uqoqwe ngabenhlanganiso ebona ngezamalungelo oluntu eyeTransparency International Zimbabwe. Uzulu uveze ukungethembi ukusebenza ngokukhululekileyo kwekhomishini okumele icubungule imikhuba yenkohlakalo elizweni, eyeZimbabwe Anti-Corruption Commission (ZACC).

UMnu. Njabulo Moyo, obemele inhlanganiso ye Transparency International, uthi inkohlakalo ibhahile eZimbabwe.

“Lamuhlanje besihlangene lapha koBulawayo ngohlelo lweRegional Anti-Corruption Indaba, khona kuyinkundla yokutshukatshuka izinto ezigqagqele ubugwelegwele, zigoqela ukuthi uhulumende uthethe inyathelo lokufake ikhomishini. So, siyahluza ukusebenza kwekhomishini, lokusebenza kwenhlanganiso ezitshiyeneyo ezizimele zodwa kanye lenhlanganiso ezisebenza lengatsha zikahulumende ukubana kungamiswa njani ubugwelegwele njengoba buyibo obungezelela indubo zikazul..”

UMnu. John Makamure, onguCommissioner weZACC, uthi sebelelungelo lokufuna impendulo kumuntu olenotho engazwisisekiyo ukuthi uyithola ngaphi.

“Ngithanda ukwazisa uzulu ukuthi khathesi ephalamende kulomthetho okhangela ngokutshontsha imali, ngakho ngumthetho osedale lephalamende esikhangelele ukuthi uzulu atsho imibono yakhe ngalokhu. Njalo ZACC le ZIMRA Kanye lezinye inhlanganiso sezilemvumo yokulanda umuntu okungakhanyiyo ukuthi inotho yakhe uyithola ngandlela bani,sebelamandla ngokusemthethweni ukufuna impendulo kulo umuntu.”

UMnu. Mike Ndiweni, umqondisi wenhlanganiso ye Bulawayo Vendors and Traders Association, uthi ikomishini le efakwe nguhulumende ilomsebenzi omkhulu wokwakha ithemba kuzulu.

Emhlanganweni lo kuvele ukuba kulesidingo sokuba ikhomishini kahulumende eye Zimbabwe Anti-Corruption Commission yakhe ithemba kuzulu ngoba inengi likhanye lithandabuza ngokusebenza kwayo ikhululekile.

Abekhansili yakoBulawayo bakhuthaze uzulu ukuthi angathuli lapho ebona umkhuba wenkohlakalo usenzakala.

Udaba Esilethulelwe NguBathabile Masuku
please wait

No media source currently available

0:00 0:04:19 0:00

XS
SM
MD
LG