Uzulu useveze imibono etshiyeneyo ngendlela uMongameli Emmerson Mnangagwa ahamba ngayo emazweni awezwekazi le Africa laphetsheya, ekhankasela ukusungulwa kwamabhizimusi elizweni kanye lokuqinisa ubudlelwano lalawo mazwe.
Lokhu kwenzakala ngesikhathi uMongameli Mnangagwa esegade indizamtshina elubhekise kwamanye amazwe awenhlanganiso eyeAfrican union laphetsheya kolwandle.
UMnangagwa ubesedolobheni le Niamey kwele Niger, emhlanganweni wokusungula uhlelo lokuthengiselana olwe Africa Continental Free Trade Area, oluzavula amasango amazwe aweAfrica ukuze athengiselane impahla ngokukhululekileyo kungela kuthelisana.
Ubikwa ehle wathatha ithuba lokukhulumisana leyinye inkokheli ye Africa egoqela uMongameli Cyril Ramaphosa wele South Africa, bexoxa ngokuthengiselana amandla kagetsi.
Ingcwethi kwezombusazwe umnumzana Richard Mahomva uthi kuqakathekile ukuthi uMnangagwa axhumane lenkokheli kanye labosomabhizimusi bakwamanye amazwe.
“Esikubonayo okuqakathekileyo yikuthi okwenziwa ngumongameli uEmmerson Mnangagwa nxa esiba lalezi in’hambo zixhumanisa iZimbabwe lamanye amanye njalo lokhu kubuya kumanyane lohlelo lukahulumende lokuthi iZimbabwe is Open for Business njangalokho okwatshiwo nguPresident Emmerson Mnangagwa njalo siyakubona ukuthi lokhu kuyenza ukuthi ilizwe libe lethuba kwezamabhizimusi njengoba sisazi ukuthi ibanlda leZANU pf lohulumende bahamba ngombono wokuthi iZimbabwe is open for Business yikho ke lokhu kutshengisela ukuthi uhulumende uqhakathekise kakhulu ekufezeni into lezi azithembisa uzulu kukhetho luka 2018”
UMnangagwa wethekelele amazwe amane angempumalanga yeEurope ngoZibandlela aqoqela iRussia, Belarus, Azerbaijan le Kazakhstan lapho alobelane izivumelwano ezithise zokuthuthukisa ezamabhizimusi lenotho yelizwe.
Nyakenye, uMnangagwa wethekele kwele Angola lapho amanyane lenkokheli yeSADC bethakazelela ukukhululwa kweAngola libutho leSADC.
Ngenyanga edluleyo kaNhlangula uMnangagwa ubeseMozambique emhlanganweni we US-Africa Business Summit.
Kodwa enye ingcwethi kwezombusazwe umnumzana Tjenesani Ntungagwa uthi kuqakathekile ukuthi uMnangagwa aphiwe isikhathi sokuthi akhe ubudlelwane obuhle lamanye amazwe.
“Ukubona kwami indaba yemihambo leyi akukho sikhathi sonke lokhu okungaletha into enhle kodwa ke lathi kumele sinanzelele ukuthi iZimbabwe isekufundeni , ukukhupha esakwenza uMugabe owahambayo safika lathi ethubeni lokuthi sifunde into ezinengi so kungaba khona ukuthi umongameli welizwe lokhu esafunda laye ukuthi abangane ngabobani , kufunakala lakho abangane abatsha bakwamanye amazwe so ngamafitshane kumele sinike isikhathi imihambo le sibone ukuthi izasilethelani. Ngibona ukuhamba lokhu kukekunikwe isikhathi sibone ukuthi kuyasifikisa ngaphi”
Kodwa okhokhela inhlanganiso emela abaphila ngokuthengisa eye Bulawayo Vendors Association umnumzana Mike Ndiweni uthi indleko edalwa yikuboleka indizamtshina zakwamanye amazwe ekuhambeni kwakhe inkulu kakhulu.
“Ngicabanga ukuthi ama foreign trips la, ukuphuma kwakhe phandle kwelizwe akukakhanyi ukuthi kulethani, ngoba izinto zikhanya zilokhu zisibanzima, imali ilokhu isebenza iphuma isetshenziswa ukuthi baboleke amafulayimatshina lapha ekhaya akula mafutha ezimota, imali emabhanga ayikho, akula magetsi, izinto zinengi ezihluphayo so angazi ukuthi amatrip la ayabe esenzelwani ngabe kusenza amatrip la ayamiswa umuntu ake athi ngizsake ngilungisise ilizwe,”
Umsekeli womkhokheli wohlangothi lwabesifazana kubandla le MDC uNkosikazi Phyllis Ndlovu ugcizelela kulokhu ethi ukuhamba kwakhe akulethi lutho.
“Akusebenzi kuyasihlukuluza kakhulu kathesi asilamanzi, kasila magetsi, into zonke zifile abantwana bethu ayisasichanzi, nxa uhlangana labo khonaphayana uhamba kuthiwa ungu MP bahle bakubuze ukuthi vele into eliyilandayo ephalamende aliyazi, umsebenzi yikutshona lihamba lisebenzisa izimali zethu lisiya emazweni libuya lilengise izandla nje lingela lutho , khonokhuyana kuyasihlukuluza kakhulu elizweni
Okukhathaza abanengi yikuthi uMnangagwa uqhubeka eboleka indizamtshina zohlonzi lwaphezulu emazweni afana laboUnited Arab Emirates, ezilendleko enkulu kakhulu.
UMnangagwa evame ukuhamba ngendizamtshina ye Boeing 737 ebhadalelwa inkulungwene ezilitshumi lambili zamadola eMelika -US$12 000, ngehola elilodwa. Lokhu kubikwa kugebha kakhulu esikhwameni sikahulumende.
