amalinks wokungena

Breaking News

Kwethuselwa Abantu Ngokubhalisa Amagama Kugwalo Lwe Voters' Roll


Ababhalisa kugwalo lokuvota
Ababhalisa kugwalo lokuvota

Izakhamizi zeNtalale emzansi yeGwanda zithi ziyethuselwa ngabalandeli bebandla leZanu PF abathi uhlelo lokubhalisa kakutsha ukuvota olwe Biometric Voter Registration (BVR) luzaveza ukuthi uvotele bani osekudale ukuthi inengi lesabe ukubhalisa ukuvota.

Lokhu kwenzakala inengi lezakhamizi zalummango lisemnyameni ngohlelo lokubhalisa ukuvota kungenani lokuthi uhlelo lokubhalisa amagama abavoti luzaqala ngoLwesine emhlubulweni wezansi yedolobho leGwanda.

Lokhu kuvele emhlanganweni oqhutshelwe ezitolo zeNtalale ngoMgqibelo lapho iqembu leVictory Siyanqoba ebeliqhuba khona inhlelo zokulondoloza ukuthula kanye lemfundiso yohlelo lwe BVR.

Izakhamizi, inkokheli zomdabu kanye lezombusazwe ebezikulumhlangano zivumelene ukuthi kuhlezi kulokuthula esikhathini esinengi eNtalale kodwa hatshi ngesikhathi sokhetho.

UMnu. Philemon Ncube uthi ukwethuselwa kwezombusazwe sekuqalile njalo okwakathesi uzulu uyethuselwa ngodaba lokubhalisa igama lakhe kuluhlu lweBVR.

“ENtalale kuthule kodwa kulabantu abethusela abanye. Yinto ebuhlungu yenaleyo … Nxa kuthwa kuyabhaliswa ukuvota kusenziwa iregistration yonale abantu kuthiwa bhalisani ama phone number sibuze ukuthi khona ukuthi amaphone number abhaliselwani kuthwe khona mhlana kusiyavotwa siyabe sibuza ukuthi iphone number yakho asiyibonanga wena uvotele ubani, so yikwethusela khonokho okunye okukhathazayo”

UMongameli Robert Mugabe nguye owaqalisa ukubhalisa kugwalo lokuvota.
UMongameli Robert Mugabe nguye owaqalisa ukubhalisa kugwalo lokuvota.

UNkosazana Juliet Nyoni oleminyaka yokuzalwa engamatshumi ayisikhombisa uvumelane loNyoni esithi udubo lodlakela luvame lapho kuyiwa kukhetho njalo ludalwa ngabantu abavela kwezinye indawo.

“Bona labo abakamana uqonde bevela kwamanye amaward sabayalela sathi thina asisoze sitshayane ngoba vele akusincedi ngalutho lakathesi akusincedi ngalutho.Kathesi kwavota imisebenzi abantwana abala, abantwana lokhu besiya eGoli.Thina siyavota ukuthi silungise ilizwe lethu asivoteli ukuthi sibulale umakhelwane so sikhangelele ukuthi abantu kumele sibe matured ekuvoteni sibone ukuthi silandela indlela eliqiniso”

Imbongi UQindi Lerato Ndlovu oyisakhumuzi njalo eNtalale uthi isifiso sakhe yikubona kulokuthula esigabeni kungabi lokuxegana ngezombusazwe.

“Ngizwe sihloniphekile ukuthi sitshelwe ngokulandelayo ngamavoti lokuthi abantu kumele babekwazi ukuthi ubudlwangudlangu ayiskho kuvota okunye engikufisayo yikuthi abantu nxa bezoyenza umhlangano bengethuselani bengapromisani ukubulalana kodwa bencedisana bakhulume ngengqubela phambili lokukhetha umuntu okumelayo hayikhona umuntu okuhlukuluzayo kumbe okwethuselayo”

Kusenjalo kukhanya inengi lakulummango lokhu lingakezwa ngohlelo lweBVR.

UNkosazana Banele Moyo ngomunye walabo abangelalwazi ngohlelo lokubhalisa ukuvota olutsha.

“Udaba lolu silande ukuzoluzwa lamhla ngoba bavele basimemile bathi sizolivotisa yikho silande ukuzofunda ngalo khonala.Hayi besingelalwazi olukhulu kangako sikwazi okweminyaka eyedlulileyo kodwa okwanamuhla besingakakuyamukeli lakho khona bezasitshela ngakho.”

Balutshwana ababhalisa kugwalo lokuvota
Balutshwana ababhalisa kugwalo lokuvota

UNkosazana Sizalobuhle Moyo uthi iyaswelakala imfundiso ngeBVR okuzadala ukuthi inengi lingabhalisi.

“Nginanzelele ukuthi icommunity yeNtalale ayikwazi lutho ngeBVR , vele abakwazi ukuthi itshoni abakwazi ukuthi iyenziwa njani so nginanzelele ukuthi amaorganisations ahambe khonangale ayebatshela information ngeBVR ngoba even uPhase three eqalisa iZEC izafika khonangale kodwa iswele ukuthi izabhalisa bani ngoba bengazi ngayo bengazwisisi.”

Iziphathamandla zogatsha loketho olwe Zimbabwe Electoral Commission zikhuthaza uzulu ukuthi abhalise amagama kuluhlu lwabavoti ngobunengi.

Uzulu kumele aphathe isithupha loba ipassport esebenzayo kanye lobufakazi balapho ahlala khona lapho esiyabhalisa.

XS
SM
MD
LG