amalinks wokungena

Breaking News

Abantu Batshengisela Phandle Kwesibhedlela eSouth Africa Abacabangela Ukuthi Kwelatshwa uChiwenga


UMnu. Constantino Chiwenga

Izizalwane zeZimbabwe ezihlala kwele South Africa ngoMvulo zitshengisele esibhedlela seGroote Schuur eCape Town lapho okucatshangelwa ukuthi umsekeli kamongameli welizwe uMnu. Constantino Chiwenga welatshwa khona.

UChiwenga ubikwa ethwalelwe kwele South Africa ngempelaviki ngemva kwembiko ethi ubeke wasiwa esibhedlela seAvenues Clinic eHarare wehluleka ukwelatshwa okusuthisayo.

Lobanje iziphathamandla zalesi sibhedlela zingathandanga ukuphawula kwabezindaba ngokuthi uChiwenga ngempela ukhonale kumbe hatshi, akade betshengisela bathe iziphathamandla zesibhedlela lesi zibatshele ukuthi akekho kiso.

Ilunga lebandla leMDC Alliance uMnu. Tinashe Chifamba ngomunye wabaqoqe ukutshengisela lokhu.

Uthi njengezizalwane zeZimbabwe bacunuke kakhulu ngokuthi uChiwenga ongomunye wabalomlandu wokubulala ezempilakahle eZimbabwe, uthola ukwelatshwa phandle kwelizwe uzulu makhaza esiyafela ezibhedlela zekhaya esezifile.

“Khathesi ngumuntu ogulayo usefuna ukubalekela eSouth Africa. Ekhaya kutheni? EZimbabwe kutheni? Izibhedlela zigcwele ekhaya. Amadokotela silawo ekhaya. Amanesi akhona. Uzokuthini la? Akayelatshwa ngamasotsha akhe. Angitsho yena uthumela amasotsha ukuthi ayelwisa abantu ayebulala abantu ezindlini lasestradeni. Kusasa sila until aze ahambe.”

Lokhu kugcizelelwa ngomuye laye obetshengisela uNkosazana Nomore Bhero.

“Sikhathele. Akabuyele eZimbabwe ayekwelatshwa njengaye wonke umuntu owelatshwa eZimbabwe. Yini eqakathekileyo ngaye? Ubexotsha amadokotela ngesikhathi ekhalala umsebenzi efuna iholo elingcono. Yindaba manje eseziza eCape Town ukuzokwelatshwa? Kufanele abuyele.”

Lokhu ngokwesibili kusiba lembiko ethi uChiwenga uyelatshwa esibhedlela kwele South Africa. Ngomnyaka ophelileyo isikhulumeli sikahulumende uMnu. George Charamba wabika ukuthi uChiwenga uyakwelatsha imikhuhlane ephathelene lemvimvinya zempini kanye lokulimala ngesikhathi kudubuka ibhomba koBulawayo emhlanganweni weZanu PF.

Inengi lezizalwane zeZimbabwe zithi kufanele iziphathamandla ziluzwe uhlupho oluziwa nguzulu wonke khona zizathatha amanyethelo okulungisa isimo elizweni.

Udaba Esilwethulelwe NguBenedict Nhlapho
please wait

No media source currently available

0:00 0:02:39 0:00

Facebook Forum

XS
SM
MD
LG