amalinks wokungena

Breaking News

Abantu beZimbabwe Bakhuthazwa Ukuhlonipha Izinqumo zeMithethwandaba


FILE: Police gather outside the Constitutional Court after the court upheld Zimbabwean President Emmerson Mnangagwa' s narrow victory in Harare, Friday, August, 24, 2018. Zimbabwe's constitutional court on Friday unanimously upheld President Emmerson Mnangagwa's narrow victory.

Umphathintambo wezemithetho uMnu Ziyambi Ziyambi uthi uzulu we Zimbabwe akumelanga ajabulele izinqumo ezethulwa yimithethwandaba nxa ziqondane lokuphathisa bona kuphela. UZiyambi utsho lokhu emkhosini wokwehlukaniswa kwedale leSupreme Court lele Constitutional Court, obukhokhelelwa ngu Chief Justice Luke Malaba.

UZiyambi utshele lumkhosi ukuba uzulu akumelanga asole imithethwandaba nxa yethule isinqumo angavumelani laso.

“Ukuthi abantu bathi uhulumende kumele adliwa ama cases ukuthi kuthiwe amadale alungile kasivumelani lakho. Ukuthi abantu bathi idale lingaphansi kombuso wethu nxa bedliwe ama cases, kasivumelani lakho. Ingqondo leyi kayimelanga siyivumele ngoba nxa singavumelanga lakho kuyabe sekusitsho ukuthi uhulumende angathonisiswe nxa ephambanisile”

Lokhu kuza ngesikhathi ibandla le MDC lihlala lisithi imithethwandaba yeZimbabwe iqondiswa yiZANU PF, njalo isetshenziswa ukulwisanisa amabandla aphikisayo.

Kuza njalo ngesikhathi iSupreme Court inqume ukuba uMnu Nelson Chamisa kasuye okumele akhokhele ibandla le MDC ngoba wathatha intambo zobukhokheli ngaphandle komthetho.

Umahluli omkhulu wemithethwandaba yeZimbabwe, uChief Justice Luke Malaba uthi ukusebenza izimele kweConstitutional Court kuqakathekile.

“Ugatsha lolu luqakathekile ngoba lutshengisa ukuqakatheka kwesisekelo sombuso elizweni. Ukuba khona kwedale leli elikhangela indaba zesisesekeli sombuso, kwenza ukuba leli dale libe yinsika yelizwe le Zimbabwe”

Kodwa umholi wenhlanganiso emela amagqwetha eye Law Society of Zimbabwe uMnu Thandazani Masiye Moyo, uthi kuyadanisa ukuba uhulumende ufuna ukusebenzisa iConcourt ukuguqula isisekelo sombuso.

“Isisekelo selizwe siyinsika yelizwe. Akuze kwaba kuhle ukuba sithi singahlalahla siguqule iisesekelo, kukanti ke isisekelo selizwe senzelwa labo abakhona, lalabo abazazalwa”

Kusenjalo inhlanganiso ye Human Rights NGO Forum, yethule umbiko ikhuthaza uhulumende ukuba ahloniphe amalungelo abantu.

“Sifikise kumphathintambo obona ngezaphakathi kwelizwe uMnu Kazembe Kazembe ukuthi kufanele kube lokuhlolisisisa njalo lokwazisa uzulu ukuba kuyini okwenzakalayo kundaba zenalezi zombili. Sihambise indaba zethu ku Commissioner General Matanga”

Ele Zimbabwe belinanza iminyaka eyisikhombisa lokhe isisekelo sombuso welizwe salotshwayo.

Kodwa ingcitshi zezomthetho zithi okudanisayo yikuthi kuze kube manje imithetho ayikaguqulwa ukuze ihambelane lokumunyethwe yisisekelo sombuso.

Ngakhoke abanengi bathi le siyimizamo kahulumende yokufuna ukuguqula isisekelo sombuso ukuze sinekeze uMongameli Emmerson Mnangagwa amandla okukhetha abahluleli bemithethwandaba engabuzwa muntu. Uhulumende uyakulandula lokhu esithi ukwehlukaniswa kweConstitutional Court leSupreme Court kuzakwenza ukuba amacala amanengi ahlulelwe lula njalo ngokuphangisa.

Facebook Forum

XS
SM
MD
LG