Kubhubhe abantu abalitshumi lanye ngeCovid-19 eZimbabwe izolo njalo kwatholakala abangamatshumi ayisitshiyangalombili lantathu, 83, belomkhuhlane lo.
Lokhu kukhweze inani labantu asebebanjwe lumkhuhlane laya kunkulungwane ezedlula amatshumi amathathu, 34,864.
Asebefile bona bakhwele baya kunkulungwane emalakhulu amathathu lamatshumi ayisithupha lane, 1,364.
Inani labahlaselwa yilumkhuhlane kanye labafayo liqhubeka lisehla ngesikhathi uhulumende elandula imbiko ethi kakaphumi lesinqumo kudaba lokuthi uzathenga uphi umuthi wokujova abantu ukuze bavikeleke kuCoronavirus.
Kulembiko ephume emaphephandebeni ebisithi uhulumende uzamelela ingcwethi ziqale zicubungule ubukhali bomuthi ozasetshenziswa andubana ilizwe libekwazi ukuthi lithenga uphi.
Kodwa umphathintambo obona ngokwethulwa kwemibiko uNkosikazi Monica Mutsvangwa uthi uhulumende uyakwazi akwenzayo.
EleZimbabwe liphakathi kokukhulumisana leleChina ngokuthenga amajekiseni alo alungiswe yinkampani yeSinopharm kanye leleRussia ngejekiseni yalo eyaziwa ngokuthi yiSputnik V.
EleSouth Africa lona lithenge umuthi olungiswe yinkampani yeAstraZeneca kwasokutholakala ukuthi awuwelaphi ngokugcweleyo umkhakha weCovid-19 osuqhamuke kulelolizwe.
Kodwa izolo inhlanganiso yeWorld Health Organization (WHO) yethule umbiko othi umuthi lo uyasebenza lakulumkhakha, okuyinto etshiye abanye bedidekile besithi abasalazi iqiniso.
EZimbabwe khona abanye bathi balokwesabela ukuthi njengoba uhulumende elembali yokubandlulula ekwabeni ukudla, ulakho ukwenza okufanayo ekuhlabeni abantu.
Ocubungula ezombusazwe uMnu Ambrose Sibindi ongumkhokheli wenhlanganiso yeBulawayo Progressive Residents’ Association utshele iStudio 7 ukuthi akumelanga kube lobandlululo ekuhlatshweni kwabantu.
Kusenjalo, inkampani yakweleRussia egebha amadayimana eZimbabwe iAlrosa PJSC ithi izathengela iZimbabwe amajekiseni eCoronavaris alungiswe kweleRussia aweSputnik V.
Umbiko lo uza ngesikhathi uhulumende esememezele ukuthi amajekiseni awaphiwe ngeleChina azaqala ukufika elizweni ngoMvulo.
Ocubungula ezombusazwe uMnu Mbuso Fuzwayo uthe lanxa kuyinto ebukekayo ukuthi inkampani yakweleRussia le izakupha iZimbabwe amajekiseni, le yinto emele yenziwe ngamankampani anotha ngemvelo yeZimbabwe.