amalinks wokungena

Breaking News

Abanye eGwanda Bathi Baqale Bethikaza, Kodwa Sebehlatshwa Labo Ijekiseni yeCovid-19


Udwendwe lwabantu behlatshwa ijekiseni yeCovid-19 eGwanda ngoLwesibili.

Lanxa abanye eGwanda bebelokuthandabuza ekuqaliseni ngejekiseni yeCovid-19, abanengi sebesukumela phezulu ukuyahlatshwa kulezinsuku ngesikhathi lumkhuhlane usuhlasela ngamandla.

EMatabeleland South yonke sokubhubhe abantu abangamatshumi amabili kusukela ekuqaleni kwalinyanga.

Umsakazo weStudio 7 wethekelele esibhedlela esikhulu seGwanda wathola kuphithizela abantu befolele ukuyahlatshwa.

Ezinye izakhamizi zithe lanxa bezilensolo, sezikhethe ukuhlatshwa ngoba sezizibonele ngawazo abantu besifa buthumuthumu ngeCovid-19 kanti njalo usumemetheka ngamandla lumkhuhlane.

UNkosazana Sithandazile Matibela ohlala emaplotini kuWard 10 eGwanda ngomunye walabo abahlatshwe lamhlanje.

“Ngile-condition ye-diabetes so ngibuyile lamuhla ukuzohlaba ukuze lami ngithole ukuvikeleka ekutholeni umkhuhlane weCovid,” kutsho uNKosikaze Matibela.

Omunye njalo wabahlatshwe ngoMvulo nguMnu Njabulo Dube, oyisakhamuzi seSenondo eGwanda, yena othe uthethe isinqumo sokuyahlaba ngoba umkhakha omutsha waleligciwane obizwa ngokuthi yiDelta usuhlasela ngolaka.

Isibhedlela esikhulu seGwanda lapho obekuhlatshwa khona abantu ngoLwesibili. Uhlelo lolu lusaqhubeka.
Isibhedlela esikhulu seGwanda lapho obekuhlatshwa khona abantu ngoLwesibili. Uhlelo lolu lusaqhubeka.

“Bengibona abanye abangane bami begula, okokuthi ngumkhuhlane okhona vele njalo kuqakathekile ukuthi umuntu lapho akhona asanithayize njalo agqoke i-mask,” kutsho uMnu Dube.

Umqondisi wezempilakahle esiqintini seGwanda uMnu Blessed Gwarimbo uthe kuyabajabulisa ukubona abantu besiza phambili ngobunengi ukuzehlatshwa ukuze bavikeleke njalo bavikele labo abaphila labo.

UGwarimba uthi bathole amajekiseni azinkulungwane eziyisithupha evela kugatsha lwezempilakahle. Ukhuthaze abalokhe bengakahlatshwa eGwanda ukuthi baze phambili ngoba lumkhuhlane ukhanya usumemetheka kahulu kulelidolobho.

Sebesedlula inkulungwane ezingamatshumi amathathu 30 000 asebehlatshwe lelijekiseni eZansi yemaNdebeleni.

Asebebulewe ngumkhuhlane lo emangweni munye sebengamatshumi amahlanu lane, 54, njalo phakathi kwabo abangamatshumi amabili badlule kulinyanga.

Abedlula amakhulu ayisikhombisa, 752 baphethwe yilolubhubhane sikhuluma nje kulesisabelo.

UMongameli Emmerson Mnangagwa izolo ukhuthaze uzulu ukuthi ahlabe lijekiseni lapho ebeka amaqhawe amabili eNational Heroes Acre.

Facebook Forum

XS
SM
MD
LG