Amazwe omhlaba ananza usuku lweWorld Cancer Day namuhla inhlanganiso yeCancer Association of Zimbabwe isithi abaphethwe yilumkhuhlane kuleli babhekane lendubo ezigoqela ukungasebenzi kwemitshina yokuwelapha, ukudula kwamaphilisi lezinye inhlelo zokwelatshwa lokuhamba imango emide besiya ezibhedlela.
Kumbiko oqondane losuku lolu, linhlanganiso ithe ubhubhane lweCovid-19 solwenze impilo yabalemvukuzane yaba nzima ngamandla ngoba abanengi bengasela ndlela zokuziphilisa.
Ikhuthaze njalo uhulumende ukuthi asungule ugatsha olubizwa ngokuthi yiNational Cancer Council oluzakhokhela imizamo yokulwisana lalumkhuhlane.
Usuku lolu lunanzwa phansi kwendikimba ethi ‘Closing the ancer care gap,’ okuyinkuthazo kubohulumende ukuthi batholise abantu abaswelayo kanye lezinothi inhlelo zokwelatshwa lumkhuhlane ngokulinganayo kungelakweyamela kwelinye icele.
Umkhuhlane wemvukuzane ulemikhakha etshiyeneyo njalo imvukuzane yesibeletho ehlasela omama yiyo ebhahileyo kakhulu eZimbabwe.
Umongi osebenza eMelika uMnu Ngelethu Mange Ndebele utshele iStudio 7 ukuthi kuqakathekile ukuthi uzulu ayehlolwa lumkhuhlane ngoba ulakho ukwelapheka ungatholakala usahluma.
