amalinks wokungena

Abasakhulayo Bahlafuna Abafisa Kukhulunywe Yinkokhelo Yomhlaba Wonke


Basebenza ndawonye abatsha emhlanganweni koBulawayo

Abasakhulayo bezabelweni zeMatabeleland leNkabazwe ngoMvulo bahlangene koBulawayo bekhulumisana ngendingeko ezehlukeneyo baphuma lemicijo abajonge ukuzihlomisa ngayo abazayayethula emhlanganweni wesine wenkokheli zamazwe aweAfrica leEurope wabasakhulayo ukuze uphehle impumela efunwa ngabasakhulayo.

Abenhlanganiso zabasakhulayo eZimbabwe yonke jikelele bebethe gwaqa koBulawayo lapho abavumelane ukuba labo bafuna amathuba angekho ekucatsheni njalo isisekelo sombuso kumele sikutsho lokho.

Osakhulayo okhokhela inhlanganiso yeYouth for Innovation Trust, uThando Gwinji, uthe bebehlangene behlafuna ngokuthi yini abayifunayo ngomhlangano ozayo.

Uthe baphume lemicijo embalwa njalo abakhangelele ukuba ihlonitshwe, ebonga ukuba labo njengabasakhulayo iSummit ibakhumbule.

Omunye njalo osakhulayo, uTawanda Mukoma, yena usola umphathintambo wabasakhulayo eZimbabwe esithi kameli ndingeko zabo.

Abanye abangene umhlangano wabatsha koBulawayo.
Abanye abangene umhlangano wabatsha koBulawayo.

Evumelana loMukoma, uThabo Authur Dube uthe kuhle ukuba amazwe omhlaba asekubone kuqakathekile ukuba baxoxisane ngendaba zabasakhulayo.

Abasakhulayo baqhubeka bengcindezelwa eZimbabwe lapho omunye wemihlangano yokudinga imibono yabo umiswe ngamapholisa eMatabeleland North eUmguza, umqoqi womhlangano lo omisiweyo, uNkosikazi Abigail Mupambi, uthe kubenzima kodwa bacine bezohlangana loBulawayo ukuze imibono yabo layo ihlanganiswe leyabanye.

Inengi labasakhulayo bathe uhulumende wabo kalawo amathuba acacayo awabasakhulayo ngakho ke kumele kubunjwe imithetho ebamba ngamandla inhlanganiso ezizimeleyo lohulumende ukuba abelengxenye esobala ebekelwa abasakhulayo kungabe kungaphi ukuze labo bakhule behlomile kwezomnotho, ezombusazwe, ezemfundo lokunye okwehlukeneyo.
Abasakhulayo beZimbabwe bathe kunzima ukuphila ezweni ngoba amathuba akhona aphiwa abasekela ibandla elibusayo kuphela, okwenza inengi labo lisalele emuva.

Umhlangano lo wandulela lowo ozaqhutshwa ngaphansi kwendikimba ethi “Investing in Youths” , eAbidjan kwele Ivory Coast ngeviki ezayo lapho abasakhulayo abakhangelele ukuhlanganisa imibono bejonge ukuyisa emhlanganweni omkhulu olesihloko esithi AU-EUYouth Plug-In Initiative wenkokheli zamazwe aseAfrica leEU.

Facebook Forum

XS
SM
MD
LG