Abasakhulayo beZimbabwe abaze eMelika emhlanganweni wezifundo ngendaba zobukhokheli phansi kohlelo lukaMongameli Barack Obama olweMandela Washington Fellowship for Young African Leaders, bona abaqeda izifundo zabo kusasa bathi kunengi abakufundileyo abakhangele ukusebenzisa nxa sebefika ekhaya ekupheleni kwaliviki.
Omunye wabatsha laba nguNkosikazi Abigail Muleya yena ubethwe ngegama nguObama ngoMvulo esithi ungomunye wabantu abasebenza nzima ukuguqula impilo kazulu ngokuletha intuthuko.
UMuleya udabuka eBinga njalo uqhube izifundo zakhe phansi kohlelo lweYALI eTulane University esabelweni seNew Orleans khonapha eMelika.
EBinga uAbigail Muleya usebenza lenhlanganiso yeZubo Trust yona eqhuba inhlelo ezitshiyeneyo zokuthuthukisa abesifazana. Siqale ngokumbuza ukuthi uzwe njani ebethwa ngegama izolo nguObama emenza umzekeliso emphakathini. Uthi njalo uyakukhwabitha ukusebenza labomama ngoba kuyibo insika yobuntu. Efika eZimbabwe, uMuleya uthi uzasebenzisa ulwazi alutholileyo kuhlelo lweMandela Washington Fellowship ukuguqula impilo zabomama asebenza labo zibengcono kakhulu.
UNkosikazi Sibusisiwe Ndlovu-Bhebhe yena uthi akukhwabithe kakhulu ngeMelika yindlela uzulu anakekelana ngayo esenza imisebenzi yokuncedana kungelambadalo, okuyinto athi uzafika ayenze laye ekhaya.
UNkosikazi Bhebhe ubeseUniversity of Delaware njalo uphatheke kakhulu kumzabalazo wokunanzwa kwamalungelo abesifazana.
UMnu Emmanuel Ndlovu yena ubeseUniversity of Virginia njalo usebenzela inhlanganiso yezakhamizi zakoBulawayo iBulawayo Progressive Residents Association. Sibuze uNdlovu ukuthi yena kuyini okumqoka aphume lakho kuzifundo zakhe.
Uhlelo lweMandlea Washington Fellowship for Young African Leaders luzagqitshwa nguNkosikazi Mitchell Obama khonapha eMelika ngoLwesithathu njalo abasakhulayo abangamakhulu amahlanu aphatheke kuloluhlelo bakhangelelwe ukuphindela emazweni abo ngoLwesine.
Abasakhulayo beZimbabwe bebengamatshumi amathathu njalo abanye bebevela emezweni eAfrica atshiyeneyo.