Lokhu bakwenze ngenjongo yokuyanikeza incwadi yensolo zabo kunkokheli zeZEC koBulawayo laseMatabeleland North bekhonona ngokungasebenzi kuhle kwalikhomishini ngesikhathi ilizwe lilungiselela ukuyakukhetho lomnyaka ozayo.
Abakusolayo kakhulu bathi yibudlelwano beZanu PF leZEC bethi buphambanisa ukusebenza kwalikhomishini ngoba lencwadi ezifunakalayo zokubhalisa ukuvota zingumgoqo kwabasakhulayo lakuye wonke umuntu ezweni.
Bafole bephethe amagwaliba alotshwe inkulumo ezehlukeneyo bephethe lesiphamaso sebhokisi lokungcwaba imisebenzi emibi yeZEC beqonde emawofisini abo lapho abavinjwe khona ngamapholisa ukungena kwavunyela inkokheli ezimbalwa lentathelizindaba ezimbili.
UMqondisi wabasakhulayo koBulawayo kuMDC-T uMlandu Ncube uthi baqhube kuhle ukutshengisela kwabo bethi ukubhalisa ukuvota makungadingi incwadi ezinengi.
Isiphathamandla sohlangothi lwabasakhulayo kuMDC-T, uNkosazana Sithabile Mlilo uthi baze ukuzofuna ukuba iZEC isebenze ingela hlangothi oluyilawulayo.
UKhansila kaWard 25, uMnu. Mzamo Dube uthe abasakhulayo benze into enhle kakhulu bayakubongela ukutshengisela lokulobela iZEC imfuno zabo.
Osakhulayo obemele inhlanganiso yeTajamuka, uMnu. Takunda Madzano uthi bazavikela ivoti yabo ekwebiweni libandla elibusayo.
UMnu Eric Gono weConcerned Citizens of Zimbabwe uthe basola ubudlelwano beZanu PF leZEC obuphazamisa ukusebenza kwekhomishi le.
Umnumzana Mqondisi Moyo omele iBulawayo Youth Arise uthi abalazindlu ngakhoke kabafuni imigoqo yokuthi kumele babe lobufakazi balapho abahlala khona andubana babhalise ukuvota.
Abasakhulayo basola kakhulu ukusebenza kweZEC njalo lomqondisi wayo uNkosikazi Rita Makarau uosengathi umele ibandla elibusayo yena eyisiqhatshwa.
IZEC iphiwe iviki ukuba iphendule imfuno zabasakhulayo beZEC njalo ibekwazi ukuba ukhetho oluzayo ngeke lwaqhutshwa konke lokho kungalungiswa.
Amapholisa ebekhutshwe ngobunengi ukuyalondoloza ukuthula njalo abasakhulayo bafole ngokuthula akula oke wahlukuluzwa.
IZimbabwe ilungiselela ukuya kukhetho kumnyaka ozayo labantu sebelinde ukubhalisa ukuvota kodwa imitshina ezasebenza ekubhaliseni abantu lokhe ingakabikhona osekulethe ukuthandabazu kuzulu ngendlela iZEC esebenza ngayo.
