amalinks wokungena

Breaking News

Abasakhulayo beMDC eGwanda Bakhala Ngokuhlukunyezwa Ngabezomvikela


Abasakhulayo bebandla leMDC eGwanda

Abasakhulayo bebandla eliphikisayo eleMDC eZansi yemaNdebeleni baxwayisa uhulumende kaMongameli Emmerson Mnangagwa ukuthi amise udlame oluqhutshwa ngabezomvikela.

Lokhu kuphume lapho kuqhutshwa umcimbi womkhankaso wokuqeda udlame ezimulini, owe16 Days of Activism Against Gender Based Violence owenzelwe emahofisini abo eGwanda ngempelaviki.

Abasakhulayo laba bathi bahlezi betshaywa njalo behlukuluzwa libutho kanye lamapholisa lapho befuna ukungena ezitaladeni betshengisela ngendubo ababhekane lazo empilweni.

Laloba isisekelo sombuso sivumela uzulu ukubuthana atshengisele lapho ekhathazekile ,osakhulayo uSandra Ndlovu ,ongunobhala jikelele obona ngokulinganiswa kwamathuba abomama labobaba kubandla leMDC uthi uhulumende uncindizelwa amalungelo oluntu.

“I16 Days of Activism isincedisa njalo isifundisa ukubana sikwanise ukuhlala sonke emphakathini sihlale silokuthula, ngilazise singakaqhubekeli phambili ukuthi uhlelo besingafuni ukulwenzela lapha, uhlelo lolu besifuna ukulufaka ezitaladeni, sisenzelani sisenzela ukuthi loyehluleke ukufika la lomama otshaya indoda esendlini lobaba orape umntwana endlini abekwazi ukuthi uyenza into embi but kungasenani lani liyayazi ukuthi iZanu njani kumbe bacabangela ukuthi besingabathini.”

Amazwi akhe agcizelelwe nguPhilip Mpofu othi uhulumende nguye ohamba phambili ngokuqhuba udlame emphakathini.

“Akula violence evumekileyo loba kanjani thina sizwile, into okumele singene kiyo njengentsha yikudlwengulwa leviolence eyenziwa nguhulumende ukuthi bayakhweza impuphu ngokuthanda kwabo ukuthi bayathi namuhla iEcocash ayisebenzi.”

UNkosikazi Nappy Moyo ongukhansila kaWard 2 edolobheni leGwanda ukhuthaze abatsha ukuthi bamele amalungelo abo.

“UHulumende wakithi ukecala kithi,mina ngithi ulecala kithi njengabantu beMDC , uyasiyalela ukwenza noma yini esiyifunayo, yiyo amalungelo ethu okumele sibelayo kodwa ubusy uyasithathela, nansi isikhathi sokuthi zenalezi i16 Days kumele sisikume sithathe amalungelo ethu sambe lawo.”

Kudaba lodlame oluqhutshwa ezindlini, uNkosikazi Nomathemba Ndlovu ongumsekeli wenkokheli yeMDC edale lephalamende uveze ukukhathazeka ngenani lamantombazana ayendiswa emancane.

“EMat South izinto zama Child marriages zigcwele ngapha belikwazi khonalokhu province yethu is the highest, yiyo ephezulu kumaprovince onke eZimbabwe ngendaba zama early Child marriages,nxa uthethe umntwana asilandaba lokuthi umlobole ngemalini as long as eUnder 18 ulecala.”

IZansi yemaNdebeleni ngeyinye yezabelo ezihamba phambili ngenani labesifazana elidlwengulwayo njalo umgcinisihlalo wabatsha kulesisabelo uMnu Edgar Ncube ukhuthaza abatsha ukuthi bengathandabuzi ukuyabika lapho bethe bahlukuluzwa.

“Kulilungelo lomuntu ukuthi amele lokhu akwazi ukuthi kumlungele, singaze sathatha ukwesaba sicatshe ngaphansi kwakho sesabe ukukhuluma, ngifuna ukutshiya imessage encane yokuthi sukuma ukhulume.”

Lumkhankaso oqale ngoMvulo mhlaka 25 Lwezi uzaqhubeka kuze uyefika umhlaka 10 Mpalakazi. Lonyaka uqhutshwa phansi kwendikimba ethi ‘Orange the World: Generation Equality Stand Against Rape!”

Facebook Forum

XS
SM
MD
LG