amalinks wokungena

Breaking News

Ukhetho LweMelika 2020

Abasekeli Baka Trump Batshengisele eWashington DC Besithi Ukhetho Olwedluleyo Aluqhutshwanga Ngemfanelo

UMnu. Joe Biden loMongameli Donald Trump

Ezinye inhlanganiso eziphatheke kulokhu ukutshengisela lakweminye imicimbi ebikhona ngoMgqibelo zibalisa i Million MAGA March, Women for Trump, kanye le Stop the Steal.

Ngesikhathi kulengxaki ngempumela yokhetho lokudinga umongameli olusanda ukuqhutshwa eMelika, inkulungwane lenkulungwane zabasekeli baka mongameli Donald Trump zitshengisele ngoMgqibelo edolobheni leWashington DC zisithi nguye owanqobayo kukhetho.

UMnu. Joe Biden, owebandla lama Democrats, owayencintisana lomangameli Trump webandla lama Republicans, nguye okhangelelwe ukuba ngumongameli welizwe ngoba ekhokhela kunani lamavoti asebaliwe.

Kodwa umongameli Trump usekhweze udaba lwempumela yokhetho emthethwandaba esithi waqilibezelwa njalo kufanele kubalwe kutsha kwezinye izigaba zelizwe.

Umongameli Trump udlule ngemota eduzane labatshengiselayo, etshengisa ukuthokoza ngaloluxhaso, njengokuthembisa kwakhe ngoLwesihlanu.

Kukhangelelwe ukuthi kube lokutshengisela okufanayo kwamanye amadolobho ngensuku ezilandelayo.

Ezinye inhlanganiso eziphatheke kulokhu ukutshengisela lakweminye imicimbi ebikhona ngoMgqibelo zibalisa i Million MAGA March, Women for Trump, kanye le Stop the Steal.

See all News Updates of the Day

UBiden Uselungiselela Ukungena Esikhundleni Sikamongameli uTrump Ekhala Nsukuzonke

UMnu. Joseph Biden ulamavoti amanengi okwedlula akamongameli Donald Trump.

Sokusele inyanga lensuku ezimbalwa ukuba uMnu. Joseph Biden agcotshwe ukuba ngumongameli wakwele Melika lobanje kungacaci ukuba uMongameli Donald Trump uzavuma ukuthi wanqotshwa kukhetho olwenziwe ngoLwezi.

UBiden ukhangelelwe ukuthi uzagcotshwa mhlaka 20 ngoZibandlela loba uTrump elokhu etshaya phansi ngenduku esithi waqilwa kukhetho olusanda kwenziwa. Kodwa akulabufakazi obuveza ukuba ukhetho lwebiwa libandla lama Democrats.

Okwamanje uTrump katsho ukuba uzakuwa emkhosini wokugcotshwa kuka Biden njengoba engavumi ukuba wanqotshwa.

Abacubungula ezombangazwe bathi kungcono UTrump ahambe emkhosini lo ukwenzela ukuthi kube lokutshiyelana isikhundla sikamongameli ngendlela ebalulekileyo. UTrump kukhanya engani ufuna ukuncintisa ukhetho lukamongameli ngomnyaka ka2024.

Bakhona abakusekela lokhu labanye abangafuni lakumbona uTrump duzane leWhite House besithi ufake ilizwe leMelika edakeni.

Omunye wabafisa ukuthi ancintise kukhetho luka mongameli nguMnu. Sikhumbuzo Mlalazi, odabuka eZimbabwe olandela kakhulu okwenzakala eMelika.

Kodwa uMnu. Hloniphani Pindi Moyo, ohlala eGwanda, uthi uTrump kumele asuke esikhundleni engakacabangi ngokungena kukhetho ngomnyaka ka2024.

Lokhu kusekelwa nguMnu. Isaac Mpofu othi ukwala kwakhe ukuvuma ukuthi unqotshwe kukhetho nguBiden kuyangisa ilizwe leMelika.

UMnu. Khaliphani Khupe uthi usuphelile umbuso kaTrump.

UBiden Ulungiselela Ukungena Esikhundleni uTrump Ephika Ukuba Wanqotshwa
please wait

No media source currently available

0:00 0:04:23 0:00


UTrump Ufuna Ukwesula Wonke Amacala Omdeni Wakhe Engakasuki Esikhundleni

UMongameli Donald Trump lomdeni wakhe. REUTERS/Carlos Barria - RTSWIFK

UMongameli Donald Trump kukhanya engani ufuna ukuthi abantwana bakhe baxolelwe wonke amacala abawenzayo ngesikhathi esesikhundleni sikamongameli. Wenza lokhu loba kungaziwa amacala abalakho ukuwetheswa ungasuka esikhundleni ngoZibandlela.

UTrump, osanda kwesula wonke amacala etheswa owayengumcebisi wakhe wezomvikela, uMnu. Michael Flynn, kukhanya efisa ukwesula wonke amacala angetheswa uDonald Trump Junior, uEric Trump, uIvanka Trump lomkakhe uJared Kushnar, obengumcebisi wakhe eWhite House.

UFlynn ucatshangelwa ukuthi waqamba amanga ngesikhathi iFBI labanye abasebenzela uhlangothi lwezemithetho behlolisiswa okwenziwa nguTrump leRussia ngokhetho olwenziwa ngomnyaka ka2016. IRussia icatshangelwa ukuba yancedisa uTrump ukuba angene esikhundleni ngomnyaka lowo.

Kodwa uTrump uyakuphika lokhu esithi ngamanga aluhlaza tshoko. Okwamanje kukhanya efisa ukuvikela umdeni wakhe. Kulabanye abakubandla lama Republicans abathi kumele azixoxele laye ngokwesula wonke amacala angabhekana lawo engasuka esikhundleni.

Kuthiwa wayengahlawuli kahle umthelo weTax njalo esephula imithetho kahulumende esenzela ukuhlala isikhathi eside ewofisini kamongameli.

Okwamanje uphikisa ukuba unqotshwe nguMnu. Joseph Biden, owebandla lama Democrats, kukhetho olwenziwe ngoLwezi. Abalandela udaba lolu bathi kuyethusa okwenziwa nguTrump. Omunye wabalombono lo nguMnu. Paul Ndlovu, odabuka koGodlwayo.

Uthi ukwenza kwakhe kuveza ukuba inkantolo iqakathekile kakhulu kwele Melika ekuphatheni ezomthetho.

UMnu. Jabulani Mabheka uyakuncoma okwenziwa nguTrump.

Kodwa uMnu. Nkosilath Ndlovu uyazisola kakhulu izenzo zika Trump.

UMnu. Mkhula Ncube uthi kuyamangalisa okwenziwa nguTrump.

Owayengumsekeli kamongameli, uBiden uselungiselela ukungena esikhundleni loba uTrump elokhu engavumi ukuba unqotshiwe kukhetho olusanda kwenziwa.

Abancoma Okunye Okwenziwa NguTrump Bathi Yindoda Ekhuluma Santando

Abancoma Okunye Okwenziwa NguTrump Bathi Yindoda Ekhuluma Santando
please wait

No media source currently available

0:00 0:04:38 0:00

Kulabancoma Okwenziwa NguTrump Labasola Kakhulu Izenzo Zakhe

UMongameli Donald Trump loMnu. William Barr.

Kulabanye abantu abathi kunengi okwenziwa nguMongameli Donald Trump okuncomekayo kubelokunye njalo okubi okwazondisa ikakhulu abantu abansundu labanye emhlabeni wonke jikelele.

Abancoma okwenziwa nguTrump kusukela ngomnyaka ka2016 bathi ngumuntu okhuluma intando yakhe hatshi lokhu okwenziwa ngeyinye inkokheli yamazwe.

Imbongi elodumo, uObert Dube, uthi uTrump ngumuntu okhuluma santando.

Kodwa uDube uthi uTrump uzehlise kakhulu ngokudlelana labantu abangaqondakaliyo.

UMnu. Sikhumbuzo Mlalazi laye uthi uTrump uvule abantu ingqondo lobanje ubecaphula abanye.

Banengi njalo abathi uTrump uthethisa abantu sonke isikhathi. Omunye wabo nguNkosazana Khethiwe Moyo othi akwenzayo khonamanje kuveza ukuba kadlelani kahle lozulu.

UMnu. Paul Ndlovu uthi akukho okuncomekayo okwenziwa nguTrump.

UTrump wangena esikhundleni wavimba abantu bokuza lokunye okutshiyeneyo. Bakhona abathakazelela akwenzayo kwele Melika kube labanye abasola kakhulu izenzo zakhe.

Okwamanje kavumi ukuthi unqotshwe nguMnu. Joseph Biden kukhetho olusanda kwenziwa. Igqwetha elikhulu lelizwe leMelika, uMnu. William Barr, uthi akulabufakazi obuveza ukuba ukhetho lukamongameli olusanda kwenziwa lwebiwa nguBiden labanye bakhe abakubandla lama Democrats.

Abancoma Okunye Okwenziwa NguTrump Bathi Yindoda Ekhuluma Santando
please wait

No media source currently available

0:00 0:04:38 0:00


ISupreme Court ePennyslvania Ilahla Icala Eliphanyekwe NguTrump Labanye Bakhe Abathi Baqilwa Kukhetho

UMongameli Donald Trump

Idale leSupreme Court esabelweni sePennyslyvania lithi uMongameli Donald Trump labanye bakhe behlulekile ukuveza ubuqili elithi benziwe libandla lama Democrats kukhetho olusanda kwenziwa endaweni le lapho uMnu. Joseph Biden anqobe khona uTrump ngamavoti afika phose inkulungwane ezilikhulu – 80,000.

Abahluli badale leli bavumelene izolo ukuthi akulalutho kudaba oluphanyekwe nguTrump lebandla lama Republicans elokuthi kulahlwe amavoti afika izigidi ezimbili – 2 million abantu abavota ngeposo, ikakhulu abakubandla lama Democrats.

Ibandla lama Republicans beselimise okwesikhatshana ukuba kuqhubekele phambili ukulungiselela ukukhetha abantu ababizwa ngokuthi ngama Electors abazakuya eWashington DC ukuyakhetha umongameli okusemthethweni.

UTrump usezame ukuguqula impumela yokhetho lolu ezabelweni ezitshiyeneyo esithi amaDemocrats aqila kukhetho lolu. Kodwa imithethwandaba endaweni ezinengi ithi akulakhetho olwaphekwaphekwa libandla leli.

Ababukele okwenzekalayo, bathi uTrump ubecabanga ukuthi uzathola elinye ithuba lokuba abuse kwele Melika kodwa ukhe phansi ngoba abantu basola indlela abuse ngayo kusukela ngomnyaka ka2016.

UMnu. Busani Mbuso Ntini uthi uBiden uselungiselela ukungena esikhundleni lobanje uTrump edonsela muva.

Uthi kusobala ukuba uBiden uthole amavoti amanengi elizweni lonke jikelele njalo lama Electoral Votes adlula okumele umuntu awazuze nxa engena esikhundleni sikamongameli.

UMnu. Peter Ngwenya uthi okwenzakala eMelika kuveza ukuba imithetho isebenza ngemfanelo.

UMnu. Belive Gaule, okubandla leZanu PF uthi okwehlele uTrump akufani lalokho okwehlela owayengumongameli uRobert Mugabe ngokhetho olwenziwa ngomnyaka ka2008 lapho anqotshwa nguMorgan Tsvangirai, owayekhokhela ibandla leMDC-T.

Okwamanje uTrump ukhangelelwe ukuba uzakhankasa eGeorgia lapho okulabantu abancintisana kukhetho lokudinga amalunga edale leSenate.

Ucele ukuba kubalwa kutsha amavote esabelweni lesi anqotshwa khona nguBiden. Indawo le ibisileminyaka eminengi ibanjwe libandla lama Republicans.

UTrump Lokhu Ekhonona Ngokhetho Olusanda Kwenziwa eMelika
please wait

No media source currently available

0:00 0:04:59 0:00


Ukwengezelela

XS
SM
MD
LG