Abasekeli beZanu PF, koBulawayo babambane labanye babo ezigabeni ezitshiyeneyo zelizwe betshengisela besithi zesulwe izijeziso zenotho ezetheswa iziphathamandla zeZANU-PF ngamazwe athuthukileyo.
UMphathintambo wedolobho lakoBulawayo uNkosikazi Judith Ncube ubale amazwi kaMongameli Emmerson Mnangagwa okumelana lezijeziso lezi ethi zenza babuse nzima.
''UMongameli ebebonisa abantu ngezinto ezibambekayo eziphazanyiswa yizijeziso zomnotho, amankampani aphakathi kodubo ngalezi zijeziso zomnotho njalo lobuhlungu esiphakathi kwabo njengelizwe.''
Elinye njalo ilunga leZANU-PF Politburo, uMnu Absalom Sikhosana uthi vele lakudala abamhlophe babelocuku ebantwini abamnyama bebenza izigqili.
''Into yiyonaleyo yokuthi akumangalisi amakhiwa awasithandi iqiniso bafisa ukuba ngabe siyafa siphele bazohlala emazweni ethu. Akulanto esayonayo njengeZimbabwe, khona kusukela ekuqaliseni amakhiwa kusukela ekuqaleni abasithandi njalo ngeke basixolele bafuna siphele.''
Isikhulumi sebandla leZAPU, uMnu Iphithule Maphosa uthi uMongameli Emmerson Dambudzo Mnangagwa usenga ezimithiyo ngezijeziso zomnotho.
''UMnanagwa leZanu-PF baqamba amanga bazama ukuvula ukwehluleka kwabo, babulele ilizwe ngesikhatshana bazama ukuvala ukwehluleka bathi abantu bafolele ukuba izijeziso zomnotho zethulwe bona besephula amalungelo oluntu, abazakuyabhikisha asazi ukuthi bacabanganjani.''
Isikhulumi sebandla leMDC-A koBulawayo, uMnu Swithern Chiroodza uthi ukutshengisela kwabantu lamuhla yikuchitha isikhathi lokudlalisa imali yesizwe.
''Ukutshengisela yikuchitha isikhathi lemali kaZulu. lnto ekhona yikuba abantu beMatabeleland yibo ababhekane lezijeziso zomnotho ungakhangela esibhedlela seMpilo abafundi ngabasuka phandle kwalindawo, imali iyasilela iyathengwa emnkambo wensitha, abantu bayatshaywa. Konke lokhu yizijeziso ezilethwa nguMnangagwa ebantwini beZimbabwe besicela lokhu kuphela noba bona abakutshoyo yikuchitha isikhathi.''
Lamhlanje ilizwe libelekhefu ukuze abantu bathole ithuba lokutshengisela bekhuthaza ukwesulwa kwezijeziso zomnotho ezetheswa iziphathamandla zeZanu PF ngamazwe athuthukileyo esola umbuso oseZimbabwe wocuku, ongalandeli intando kazulu, usephula amalungelo oluntu, lokunye okunengi okumele kuguqulwe andubana zesulwe.
Ngemva kokufola abantu bathole njalo ithuba lokubukela umdlalo webhola phakathi kweArenel leCasmine.
Ngemva kwenguqu kuzakubalokhonsathi ezaphela yabaculi ababalisa uSendra Ndebele, Clement Magwaza labanye.
