Abaphila ngokuthengisa eHarare abe National Vendors Union of Zimbabwe bathi kuyadanisa ukuthi uhulumende usecabange ukubahlasela ngamapholisa langamasotsha kodwa kabasoze basuke lapho abathengisela khona, ngaphandle kokuba bephiwe ezinye indawo zokusebenzela.
Lokhu kuza ngemva kombiko kamphathintambo wentuthuko yamadolobho lezabelo, uDr Ignatius Chombo, othe izolo omanisipala ilizwe lonke kumele basuse bonke abaphila ngokuthengisa laba, phakathi kwamadolobho lakuma Growth Point.
Emhlanganweni lentathelizindaba owenzelwe e Media Centre ngoLwesibili ekuseni, umkhokhela wenhlanganizo ye NAVUZ ilizwe lonke, umnumzana Samuel Wadzai, usole inyathelo likahulumende leli.
UWadzai uthi uzulu ophila ngokuthengisa akali ukuthi asuke phakathi kwamadolobha, kodwa okuhluphayo yikuthi azikho indawo zokuyassebenzela khona.
Wasola njalo ukusebenzisa abezomvikela ekululungiseni loludaba, ethi asikho isizatho salokho ngoba akulampi elizweni engabangela ukuphuma kwamasotsha enkambeni.
Umnumzana Benard Ncube ungubaba osesemutsha ophila ngokuthengisa, phakathi kwedolobha le Harare. UNcube uthi uhulumende kumele alungisise isimo kwezomnotho ehlukane lomkhuba wokuhluphana labo, kungasintando yabo befuqwa yisimo esikhona elizweni. Wemba phansi ngenduku ethi akasoze asuka lapho athengisela khona.
Kazaneli indawo lapho okumele bathengisele khona uNcube athi kumele yena labanye bakhe baye kizo.
Unkosikazi Esildah Moyo ngowesifazane olengane ezintathu njalo ephila ngokuthengisa edolobheni leHarare. Yena uthi uhulumende kenze akufunayo ngoba akaqhubi lumsebenzi ngokuthanda kodwa akala eyinye indlela yokuziphilisa.
Lokhu kusekelwe ngomunye njalo wabaphila ngokuthengisa edolobheni le Harare,umnumzana Sitsha Sitsha.
Elinye lamacele ebandla leMDC elikhokhelwa ngumnumzana Morgan Tsvangirayi labo basole kakhulu lesi senzo sikahulumende.
Emhlanganweni lentathelizindaba, owenzelwe emahofisini awe MDC-T, eHarvest House ngoLwesibili emini, umkhokheli walo umnumzana Morgan Tsvangirai uthi lelinyathelo likahulumende weZanu PF, yisibonelo sokuba usehlulekile ukulungisisa isimo somnotho welizwe.
UTsvangirayi uthi kuyinto edanisayo ukuba endaweni yokufeza lokho i-Zanu Pf yakuthembisa uzulu, okugoqela ukusungula imisebenzi eyedlula izigidi ezimbili - 2 million, uhulumende usefuna ukujezisa asebethole ukuziphilisa ngokuthengisa.
Umqondisi wohlangothi wenhlelo kuleli bandla umnumzana Abednico Bhebhe usole kakhulu inyathelo likahulumende lokuhlukuluzana labantu abazama ukuselela imhuli zabo.
Wengeza uBhebhe esola inyathelo lokusetshenziswa kwabezomvikela ukususa laba bantu ikanti kungumsebenzi kamanisipala.
Abe NAVUZ bakhala ngendawo zokuthengisela bethi kazeneli lezo okumele bayesebenzela kizo, zisanelisa ukuthwala inkulungwane eziyisithupha kuphela- 6 000, ikanti inani lamalunga abo eHarare kuphela okwamanje, lisedlula kancane inkulungwane ezilikhulu.
Abezombusazwe bona balufanisa lohlelo oluqhutshwe ngomnyaka ka 2005 lweOperation Murambatsvina kanye lolwe Gukurahundi oluqhutshwe kweleMaNdebeleni ilizwe lisanda kuthola uzibuse.