Abaphila ngokuthengisa bathi kulokutshona besola bona, kumele kusolwe umanisipala onguye owehluleka ukuqhuba umsebenzi wakhe, wokutholisa izakhamizi amanzi ahlanzekileyo.
Linkulumo iza ngemva kokuqhamuka komkhuhlane wesihudo secholera eChegutu, osubulele abantu abane lanxa uhulumende ethi usunganeno.
Kungalesi sizatho umanisipala weHarare labogatsha lwezempilakahle, bethule imibiko ethi abathengisa ezitaladeni, yibo abangezelela ukusabalala kwe cholera.
Omunye wabaphila ngokuthengisa othande ukwaziwa ngegama lokuthi nguMama Kuzanga, uthi iyamzondisa linkulumo yokuthi yibo abangezelela kudubo lwe cholera.
Umnumzana Tjenesani Ntungakwa, ingcwethi ecubungula ezombusazwe, uthi akavumelani lalokho osekukhulunywa yiziphathamandla.
U Ntungakwa uthi akuqali e Zimbabwe ukuba labathengisayo kodwa okukhona yikuba iziphathamandla kwamanye amazwe zibalungisela indawo ezilondolozekileyo lapho bengasebenzela khona.
Uxwayisa umanisipala lohulumende ukuba babuyele kundlela yokuhlola lokulondoloza indawo abasebenzela kizo ukuba zihlanzekile na loba hatshi.
Abathengisayo bathi umanisipala lohulumende kumele baqhube umsebenzi wabo, wokutholisa uzulu amanzi ahlanzekileyo, ukubutha izibi kanye lokulondoloza impompi ezithwala ingcekeza ukuze luphele loludubo.
Loludubo lungaqali kuleli njalo kubangelwa yikuswelakala kwamanzi ahlanzekileyo, ngoba uke waqhamuka njalo ngomnyaka ka 2008 emzini weBudiriro,wasabala ilizwe lonke abedlula amakhulu amathathu balahlekelwa yimpilo.
