amalinks wokungena

Breaking News

Abathintwa yiGukurahundi Bathi Ukulandula Lesi Siga Akube Licala


Umhlangano we NPRC
Umhlangano we NPRC

Abahlukuluzeka ngombuqazwe weGukurahundi bathi abekomishini ebona ngezokukhumisana umlotha eye National Peace and Reconciliation Commission kumele bakhulumisane labakhokhela lesi siga ukuze baxolise njalo bafake isinqumo sokuthi ukulandula lesi sehlakalo licala.

Lokhu kuphume emhlanganweni owenzelwe eNational Art Gallery ko Bulawayo ngoLwesihlanu.

Lumbuthano uqoqwe ngabenhlanganiso ye Habbakkuk Trust, ngenjongo yokuthi abasila labathinteka kumbuqazwe weGukurahundi baxoxisane labe komishini ebona ngokukhumisana umlotha, eye NPRC ngalokho abakhangelele ukuthi ikwenze nxa sokulungisiswa udaba lweGukurahundi.

Omunye wabasindayo kulesi siga, unkosikazi Queen Maligwa uthi ufisa ukuthi ikomishini le isebenze ihlangene labantu abalolwazi abavela kwamanye amazwe.

“Ngoba laba abantu siyakwazi ukuthi bapayer iallergiance yabo kulabo ababayibo amaperpertrators.Bengifisa ukuthi babize abantu abaIndependent ukuze bazosenza labo. Njengoba lawe umzwile ukhomishina esithi kulalapho angeke adlule khona. Uhlala emile egayidwa yikuthi who is buttering his bread,” kutsho uMaligwa.

Umnumzana Ben Moyo uthi ulindele ukuba abantu abakhokhelayo kulesi siga, abaphathekayo labalandulayo ukuthi kwaba lombuqhazwe kumele bathonisiswe.

“Sifuna ukuthi iCommission leyi ivume ukuthi lokhu okwenzakalayo ngumbuqazwe, okwesibili silindele ukuba bonke abenza amacala baye ejele, abavumayo yibo esingabaxolela ngilindele futhi ukuthi kube le affirmitie action iloss leyana siyiquantifaye,” kutsho uMoyo.

Olwelwa amalungelo oluntu esebenza lenhlanganiso yeBhetshu likaZulu umnumzana Mbuso Fuzwayo uthi kuqakathekile ukuthi iKomishini ixwayise izisebenzi zikahulumende ukuthi kumele badedele khatshana lodaba lokukhumisana umlotha ukuze uzulu akhululeke.

“So ngibona kuqakathekile ukuthi amadepartments ade esebenza ukuhlukumeza abantu enziwe ebe aware ukuthi alisela sabelo lapha madoda uhlelo lolu luvunyelwe. Angikhulumi ngifihla lami nginje bangibambile,” kutsho uFuzwayo.

Isikhwicamfundo esikhangele ezokuthula unkosikazi Sibonokuhle Ncube Ndlovu uthi amalunga akhona kuhulumende okwamanje ayekhona kuhulumende owayesebenza ngesikhathi sombuqazwe.

“Nxa sesicela ukuthi uhulumende axolise isizwe kungalungisani ukuxolisa lokhu. Amalunga athize akuhulumende okhona khathesi ayekhona ngesikhathi sikahulumende owayekhona ngesikhathi sombuqazwe,” kutsho uNdovu.

Ukhomishina mnumzana Leslie Ncube uthi bayemukela konke abakuthole kulumhlangano sebezahlalake phansi bahlaziye ukuthi udaba lweGukurahundi lungaphathwa njani.

“Njenge commission ayisikho ukuthi silande ukuzo imposer but sithatha okutshiwo ngabantu siku implemente. Kunengi abakutshiloyo ngakho sizahlala phansi njengekomishini sikucubungule ukuze kuhambelane lezifiso zabantu,” kutsho uNcube.

XS
SM
MD
LG