amalinks wokungena

Breaking News

Abatsha Abakumabandla Atshiyeneyo Bathi Akumelanga Kubelodlakela Lonyaka Ngesikhathi Sokhetho


Abatsha bathi sebediniwe ngodlakela ngesikhathi sokhetho.

Abatsha abasekela amabandla atshiyeneyo sebelobelane isivumelwano sokuthi kabasoze benze udlakela lonyaka ngesikhathi sokhetho lokudinga amakhansila, amalunga edale lephalamende lele Senate lomongameli omutsha.

Balobelane isivumelwano lesi emhlanganweni oqoqwe yinhlanganiso yeVictory Siyanqoba Trust ngoLwesihlanu koBulawayo.

Umhlangano lo ungenwe ngamabandla agoqela eleZanu PF, Zapu, People’s Democratic Party, Mthwakazi Republic Party, amacele amabili aweMDC, ele National People’s Party lamanye ambalwa.

UMabutho Moyo, umsekeli kanobhala jikelele kubandla leZanu PF, uthi kuqakathekile ukuthi abasakhulayo bengavumi ukusetshenziswa njengezikhali zobudlwangudlwangu.

“Kuqakathekile kakhulu ukuthi kube lokuthula njalo abatsha yibo abasetshenziswa njengezikhali zodlakela ngenxa yokwehlukana kwemibono. So, njenge new dispensation sithi ipeace iqakathekile.”

UAdrian Rendani Moyo, isikhulumi sabasakhulayo sebandla leMDC ekhokhelwa nguProfessor Welshman Ncube, uthi kuqakathekile ukuthi abatsha babekwazi ukuthi lungaphela ukhetho bazaqhubeka bephila labantu banye ababahlukumezayo.

“Ngithanda ukukhuthaza abanye abatsha lapha ukuthi sesifikile isikhathi sokhetho asikhankaseni ngokuthula sisebenzeni siqede kudlule akudingi ukulwa kumbe udlakela akudingi ukuthi sinyathelane ukuthi sivumelane kuzathi sekudlulile sizabe silokhe singabantu, asithandaneni njengabantu bezwekazi leAfrica.”

Lokhu kusekelwe nguMthulisi Ndlovu Magabha, owebandla lePDP, othi abasakhulayo bayahlupheka kakhulu ngakho kumele basukume bezimele bananzelele ukuthi elakusasa labo liyachitheka besetshenziswa.

“Nxa sikhuluma nge peace nginanzelela ukuthi ilizwe lethu lonakele ngenxa yabakhokheli bamabandla ngoba yibo abasebenzisa abatsha. Ngibona engani ilizwe lethu selifuna ukuthi abatsha batshitshe umkhumbulo ngoba thina yithi esidubekayo ngakho sekumele sifake umuntu ongumama.”

Ukhomishina weNational Peace and Reconciliation Commission, uMnu. Leslie Ncube, uqonqosele ukuqakatheka kokulondoloza ukuthula ukuze ilizwe lenelise ukuhuga abafuna ukuqala amabhizimusi.

“Ngizathanda ukuthi ngithi elections are around the corner, njenge National Peace and Reconciliation Commission silitshayela ihlombe, Peace is key for economic growth, ngilincweba indleba ukuthi singaweli esimeni lesi, ngoba ungayenza ipolitical violence akusoze kwahlala insuku uzagwetshwa masinyane.”

Abamabandla ezombusazwe ehlukeneyo babhalelelane phansi bethembisa ukuthi abasoze baphatheke kwezodlakela njalo anikeze ukhomishina ugwalo abalubhalelane phansi oluyisithembiso, njengendlela yokwenza isiqiniseko sokuthi abasoze benze ubudlwangudlwangu ngesikhathi sokhetho.

Facebook Forum

XS
SM
MD
LG