amalinks wokungena

Breaking News

Abatshayeli Baka ZUPCO Bakhalala Umsebenzi koBulawayo


Bulawayo Buses

U-Bulawayo uvuke ebhekane lodubo lokuswela izimotha lamabhasi athwala abantu ukungena lokuphuma enzikini yedolobho, NgoMvulo, kulandela ukukhalala umsebenzi okwenziwe ngabatshayeli benkampani kahulumende yamabhasi, eye Zimbabwe United Passenger Company (ZUPCO).

Izisebenzi zenkampani kahulumende yamabhasi eye Zimbabwe United Passenger Company zikhalale umsebenzi, zikhala ngokuthi zifuna iholo elingcono kanye lomumo wokusebenza omuhle.

Lamuhla abatshayeli bamakombi aphiwa imvumo yokusebenzelana labeZUPCO, bebesebenza kodwa bebekhulelwa linani labantu abakade befuna ukugada, kodwa kuthe utshaya ihola letshumu 10:00am ekuseni amabhasi ambalwa abeseqala ukuthwala abantu.

Umnumzana Ernest Tshabalala otshayela kunkampani eye ZUPCO ukhonona ngeholo njalo uchasisa abakhala ngakho.

“Thina esikufunayo yikuthi sithole isalary esifaneleyo. Kunje koZupco akula off, uze uphumule nxa ibhasi yakho ingafa kodwa esikutholayo akuhambelani lomsebenzi esiwenzayo. I sikhathi esingena ngaso lesokutshayisa vele asikhulumi langaso, kungakho sisithi kungcono lathi kuke kukhangelwe imali lendlela esisebenza ngayo, siphiwe okusifaneleyo.”

Umnunzana Ambrose Sibindi umgcinisihlalo wenhlanganiso yezakhamizi eyeBulawayo Progressive Residents Association, ukhuthaza uhulumende ukuba avumele abangekho phansi kukaZUPCO ukuthi baqale ukusebenza.

“Yikho lokhu esasikhuluma ngakho ukuthi sicela ukuthi abantu kwezokuthwala kwabantu Ku transport sector kungabi lemonopoly ye Zupco kuphela. Lamuhla abantu badubeke kakhulu ekuseni, amabhasi engabonakali. Kungabe kudalwe yi strike loba hatshi kumbe kube yifuel okukhona yikuthi abantu baswela indlela zokuhamba. Uhulumende kavulele amanye ama players kutransport, kafake imithetho okumele ilandelwe ukwenzela ukuthi mhlana sesilohlupho luka Zupco abantu baqhubeke baye emsebenzini bengahlupheki.”

Unkosikazi Evelyn Songo umhlali wakoBulawayo uthi uhulumende uyazehlulekela ukulungisisa udubo lokuthwalwa kukazulu.

“Sesithwele nzima ngoZupco thina ngoba kathembakalanga. Lamuhla sigade nzima ekuseni, lanxa ungagada ama private lamapholisa layo ayalithwalisa nzima Ku roadblock. Okukhona yikuthi uZUPCO seyehlulekile, kasibuyele lapho esasikhona. Kunje sicine siphuzile, i government kayilungise masinya lapha yekele ukufuna ukubusa kuzo zonke indawo ngapha isehluleka”

Unkosikazi Thandaza Moyo omunye njalo umhlali wakoBulawayo uthi ukuswelakala kwemota zokuhambisa kuyabahlukuluza emsebenzini

“Lapha engisebenza khona sibhadalwa ngama hours owasebenzileyo. So nxa itransport ihlupha kutsho ukuthi leyami imali iyehla ngoba ngizafika ngiphuzile emsebenzini. Amakhiwa kawalani lakho lokhu ukuthi uZUPCO ukustrike, i company policy ayitshintshi. Sicela ukuthi uhlupho lolu lulungiswe ngoba lathi kuyasi harasser.”

Imizamo yokuxhumana leziphathamandla zikaZUPCO yehlule ngoba bebengadobhi ucingo.

Kuviki edlulileyo ngoLwesihlanu inkampani eye ZUPCO ikhuphule imbhadalo zokugada amabhasi kanye lamaKombi.

Imbadalo yokugada ibhasi isuke kudola angamatshumi amane ZWL $40 yaya kumadola angamatshumi amahlanu ZWL $50, kuthi ikombi isuke kumadola angamatshumi amahlanu ZWL $50 yaya kumadola angamatshumi ayisithupha ZWL $60.

Izitimela lokhe zingakaqali ukuhamba koBulawayo kodwa zikhangelelwe ukuba lapho sezihamba zizabe zisiya eCowdray Park le Emganwini, lokhu kuyimizamo kahulumende yokuqeda uhlupho lwendlela zokuhambisa elizweni.

Facebook Forum

XS
SM
MD
LG