amalinks wokungena

Breaking News

Abatshayeli Bezimota Bakhala Ngokonakala Kwemigwaqo eZimbabwe


Isimo semigwaqo eZimbabwe

Abatshayeli bezimota bakhala ezimathonzi ngesimo semigwaqo egcwele amagodigodi bethi bahlawula imali enengi yemithelo yezimota leyentuba zamatollgates kuhlangothi lweZimbabwe National Road Authority -iZINARA abangayazi lokuthi isetshenziswani nanku imigwaqo ingahambeki.

Ukuna okwenza izulu lanxa kusamukelwa ngenjabulo ilizwe lonke libikwa lize lomonakalo omkhulu emigwaqweni eminengi yeZimbabwe emadolobheni lasemaphandleni esimahlephuhlephu ingasahambeki ngenyawo, amabhayisikili lezimota.

Isimo semigwaqo eZimbabwe
Isimo semigwaqo eZimbabwe

UMnu Mathew Sibanda okubhizimusi lokuthwala abantu eZimbabwe laseSouth Africa uthi bahlawula imali ezinengi zemithelo yezimota kodwa imigwaqo ingahambeki.

“Sihlawula imithelo yezimota ephezulu kakhulu kusukela kumalicence, insurance lakumatollgate kodwa imigwaqo ifile ayihambeki sicela uhulumende athathe inyathela. Abantu sekunzima ukuthelela izimota kuyadula, imota encane ibhadala insurance ye$2,700 kuthi umthelo $950, Amaninibus ibhadala $5,000 kisiya ku$7,000 insurance umthelo $1,125, itruck $14,000 kusiya ku$15,000 insurance umthelo ukhuphuka uyephezulu sekusisebenzisa nzima, wenza ngabezimota imali. Amatollgate akhuphuka kokuphela. Imota encane ibhadala $45, ibhasi letruck-$500, imali le iyaskhathaza kakhulu abantu sebaze bakhanda indlela zokubalekela amatollgate.”

Umtshayeli uMnu Moses Mpala uthi kalahlupho ngemithelo yezimota kodwa ukhala ngesimo esibi semigwaqo engasahambekiyo.

“Angilankinga lokukhuphulwa kwemithelo kodwa ngikhathazwa yikuthi siyahlawula kodwa imigwaqo ayilungiswa imota zethu ziyafa njalo nje ngoba imigwaqo ifile kodwa uhulumende ethatha imali. Uhlupho lwethu lukumigwaqo engasahambeki kodwa thina sihlawula imali ezinengi. Imigwaqo kayilungiswe yikho lapho esilohlupho khona kakhulu.”

Isikhulumi seZimbabwe National Road Authority-iZINARA, uMnu Tendai Mugabe uchaze ukuba bakhuphula imithelo yezimota emigwaqweni lokunye ukuze benelise ukuthola imali yokulungis imigwaqo ezweni.

“Imali ebesiyithatha kubanini bezimota ibingenelisi ukuthi siphe amakhansili lezinye ingatsha esisebenza lazo ukuba balungise imigwaqo. Kulandela ukukhuphula imali yamatollgate lemithelo yezimota sesilakho ukuthi senelise ukupha abalelongelo lokulungisa imigwaqo.”

Olwela amalungelo oluntu, uMnu Effie Ncube uthi imali ehlawulwa ngabezimota ifana lemali ethelwa emgodini ngoba ayakhi migwaqo.

Isimo semigwaqo yonke yeZimbabwe evele ilesikhathi ingalungisiswa okwamanje sesisibi ngamandla ngenxa yokuqala ukuna kwezulu. Ngeviki edlule ikhansili yedolobho lakoBulawayo yethule imibiko ethi imali abayiphiwa yiZINARA incane kakhulu ayeneli ukulungisisa imigwaqo yalelo dolobho ngakho bazakuma ukuqala ukulungisa imigwaqo baze baphiwe imali eyenelayo.

Kucwaningo lweRoad Traffic Accident Cases, Trends and Preventive Measure olwenziwa ngomnyaka ka2012-2018 abeTraffic Safety Board of Zimbabwe bathi isimo semigwaqo esibi sabangela ingozi ezinengi zomgwawo ngaleso sikhathi okokuthi ngelanga abantu abedlula abahlanu bebebulawa zingozi zomgwaqo ezweni.

please wait

No media source currently available

0:00 0:03:41 0:00

Facebook Forum

XS
SM
MD
LG