Izikolo zivulele ihlandla lakuqala ngoLwesibili kulababalisi abafundisayo njalo abazali bekhala ngentengo yezembatho zabantwana esikhuphukile kanye lokuswelakala kwemali yezifundo.
Isakhamuzi sakoBulawayo, uMnu, Thomas Sithole, ukhala ngokuthi abafundi bahambile esikolo bengela mfanelo ezeneleyo zesikolo.
Kodwa ubonge ababalisi ababuyele emsebenzini.
“Ababalisi bakhona ezikolo ubunzima esihlangane labo njengabazali yintengo yezingwalo lezinye imfanelo ezifunakalayo. Abantwana senelisile ukubasa esikolo bengelazo zonke imfanelo ezifunakalayo intengo ziphezulu kunzima ukuthi sikuthole konke okufunakalayo.’’
Esinye njalo isakhamuzi sakoBulawayo, uNkosikazi Sithabile Moyo, uthi ababalisi bakhona njalo ezikolo zikahulumende ischool fees asikhuphukanga kuqathaniswa lezikolo ezizimeleyo.
UMnu. Simion Sibanda, olendodana efunda esikolo esizimeleyo, uthi udubo olukhona yintengo yempahla yesikolo ephezulu njalo ababalisi bakhona ezikolo.
“Sikhangelane lodubo lokuthenga amauniform abantu abalamali, imali yakuleli ayisathengi, ababalisi bakhona kodwa owami umntwana ufunda eprivate school sibona engathi kuzakubakuhle ezikolo.”
UNkosikazi Johanna Moyo uthi intengo yempahla yezikolo ikhuphuke kakhulu. Ucele uhulumende ukuba angenele njalo aholise ababalisi idola lemelika.
“Zikhwelile kakhulu impahla izicathulo zabantwana ziqala ku$70 kusiya kukhulu lamadola, amauniform awathengeki. Udadewethu olamaphahla usethe wasebenzisa amakhulu ayisithupha amadola kodwa akukeneli okufunakalayo, uhulumende kangenele aphe ababalisi iholo ngedola lemelika mhlawumbe izinto zingathengeka intengo yehle..”
Isimo somnotho simi manzonzo, ukusilela kwemali emabhanga, ukukhuphuka kwentengo yempahla yesikolo lokudla kanye leschool fees sekutshiye abazali bedideke ingqondo.
