Abazali abalabantwana abasezikolo bakhala ngentengo ephezulu yezigqoko zesikolo zama uniform kanye lendleko yokunye okufuneka esikolo okubalisa ingwalo.
Ukusilela kwemali emabhanga sekulethe obunye ubunzima kubazali kanye lokwamafutha ezimota edolobheni leGwanda osokudale ukuthi inengi labazali liyehluleke ukuhambisa abantwana ezikolo.
Bekuyisiphithiphithi ngoMvulo phakathi kwedolobho leGwanda lapho inengi labazali selithenga impahla zabantwana abafunda behlala ezikolo emaboarding bona abahambe ezikolo ngoMvulo.
Izikolo zivulwa elizweni lonke jikelele ngoLwesibili njalo abazali abaxoxe leStudio 7 bathi babhekane lobunzima ngoba intengo yempahla zesikolo esiqonge kakhulu izigqoko zabafundi befundo yaphansi ama-uniform, ebezibiza amadola alitshilumi lambili-$12, sezibiza amadola alitshilumi lasitshiyangalombili-$18, kuthi amabhatshi amablazer, abebiza amatshumi amathathu lasithupha-S36, asebiza amadola angamatshumi amane lasitshiyangalombili-$48.
UNkosazana Memory Ndou obephelekezela umntanakhe ukuya gada ibhasi, ngomunye walabo abakade bekhala ngentengo yempahla zesikolo.
Ukusilela kwemali emabhanga osekudale ukuthi inengi lisebenzise amakhadi lapho lithenga ngezinye zezizatho esezidale ukuqonga kwentengo yempahla zesikolo.
UMnu. Sibangilizwe Ndlovu ngomunye wabazali okhale okufanayo esithi ukusilela kwemali emabhanga kudale olunye udubo ngoba ezinye izikolo zifuna imali ezandleni.
Kungenani lokuthi uhulumende uthi abantwana bengaxotshwa esikolo ngembangela yokungabhadali inengi lamaboarding kavumi ukuthi abafundi belugxobe ezikolo bengabhadalanga.
Inengi labazali lithwele nzima ukuhambisa abantwababo ezikolo ngoba kungela mafutha ezimota emagalajini okudale ukuthi athengiswe ngentengo ephindwe kabili nsitha.
UMnumzana Herbert Moyo ngomunye obhekane lodubo lokusilela kwamafutha ezimota yona aphele kuyowonke amagalaji aseGwanda izolo ebusuku.
Ukusilela kwamafutha ezimota kuza ngesikhathi uhulumende kaMongameli Emmerson Dambudzo Mnangagwa ephethe esithi ulungisisa umnotho wakuleli.
