amalinks wokungena

Breaking News

Abe Footballers Union of Zimbabwe Bathi Umdlalo Wenguqu Kawuphenduke


Inhlanganiso ye Footballers Union of Zimbabwe isisungule umkhankaso wokuba umdlalo wenguqu udlalwe futhi elizweni lase Zimbabwe.

Umdlalo wenguqu umiswe ngenyanga kaMbimbitho nyakenye kwele Zimbabwe ngemva kokuba umkhuhlane we Covid – 19 usuhlasele umhlaba wonke jikelele.

Kwamanye amazwe usudlalwa njalo umdlalo wenguqu kodwa kwele Zimbabwe imizamo eyokuvuselela lumdlalo ekupheleni kwanyakenye ayizange iphumelele njalo lalonyaka akukacaci ukuba kuqhubekani.

Kumkhankaso wabo owokukhuthaza ukuba ibhola lidlalwe abe Footballers Union of Zimbabwe bakhulume labanye babadlali abadlala kusigaba saphezulu basebefaka imifanekiso yakhona ekhasini labo le Facebook.

Omunye wabadlali laba ngumgadli weqembu le Chicken Inn uObriel Chirinda.

“Khathesi sizihlalele asenzi lutho. Sekumele sihlanganise ukuze siselele imuli. Bekungalunga nxa ibhola lingadlalwa njalo ukuze sibuyele emsebenzini ngoba sesilomnyaka singadlali njalo singenzi lutho,” kutsho uChirinda.

Unozinti weqembu le Highlanders uAriel Sibanda laye uthe ukungadlalwa kwebhola sekudale ukuba umangoye atholakale elele eziko ezindlini zabadlali bebhola.

“Inengi lethu abadlali besivele siphila ngemali esiziphiwa nxa sithe sanqoba,” kutsho uSibanda.

Umkhankaso we FUZ lo usuthole usekelo oluvela kubadlali abalokhe bedlala, akubadlali abalodumo asebathatha umhlalaphansi, abaqeqetshi kanye labalandeli bomdlalo wenguqu.

Inhlanganiso ebona ngokuqhutshwa komdlalo wenguqu eye Zimbabwe Football Association ensukwini ezedluleyo ilobele inhlanganiso elawula ezemidlalo elizweni eye Sport and Recreation Commission icela ukuba umdlalo wenguqu uvunyelwe ukuba udlalwe njalo basalinde impendulo.

Inhlanganiso ye Premier Soccer League layo iphezu kokubumba amasu awokuba umdlalo ungaqhutshwa njani nxa sebethole umvumo eyokuba imidlalo yesigaba saphezulu isingaqala.

Facebook Forum

XS
SM
MD
LG