Abohlangothi olubona ngokutholiswa kwamalicense okusakaza elizweni olweBroadcasting Authority of Zimbabwe - BAZ bazise ukuba sebegqibe
umsebenzi wokukhangelisisa amankampani abhalele ukuthola imvumo
yokusungula lumsebenzi elizweni.
Abe BAZ banikeze amankampani ayisithupha phakathi kwalitshumi lane akade ebhalele ukuthiatholiswa amalicense lawa.
Lokhu kuphume emhlanganweni lentathelizindaba owenzelwe
emahofisini abeZimbabwe Media Commission Boardroom, eHarare, ngoLwesihlanu.
Elinye lamalunga aweBoard yeBAZ umnumzana Rodney Mazeyewe uchasisa ngabakwenzileyo.
"Umsebenzi lowu, sakhangela ama applications awabuyayo sayenza lama
public inquiry. Laba abaphumelelayo yilaba, sinike abayisithupha
amaliyisenzi awe TV, owakuqala yi Jester Media Private Limited,
trading as 3K TV. Owesibili, Zimbabwe Newspapers 1980, Private Limited,
trading as ZTN. Owesithathu, Rusununguko Media Private Limited,
trading as NRTV. Then sekubuya ACACIA MEDIA GROUP Private Limited
trading as Kumba TV. Owesihlanu, Fair Talk Communication Private
Limited, trading as Ke Yona TV. Owokucina, owesithupha, Channel
Dziimbahwe Private Limited ttrading as Channel D. "
UMnu. Qhubani Moyo isiphathamandla kwenye yalamankampani
kamabonakude eye Fairtalk Communications wamukele ngenjabulo ukuba
inkampani yakhe ibe ngeyinye yabakhethiweyo ukuphiwa iLicense.
UMoyo uveze njalo ukuba isigodlo salomsakazo weKiYona TV sizaba
koBulawayo loba nje bezosakaza ilizwe lonke.
Lanxa uzulu labenhlanganiso ezilwela ukuthukululwa kwamagagasi
elizweni okubalisa eye Zimbabwe Zimbabwe Association of Community
Radio Stations - ZACRAS zisithi lanxa kulinyathelo elihle elithethwe
ngabe BAZ okwakuqala embalini yelizwe, abajabuliswa
yindlela ekhethwe ngayo labo abathole amalicense.
Umqondisi we ZACRAS, unkosikazi Vivienne Marara-Zhangazha uchasisa
ngabakhonona ngakho.
“Esingakuthakazeleliyo yikuthi abantu bakhona abanikwe amalayiyisensi,
akula diversity ekade sikhuluma ngayo. Okukhona yi plurality, so thina
njengeZACRAS sithi yebo kungaba le plurality in terms of amanumbers,
amanye amabroadcasters asekhona kubroadcasting sector yethu, okusalayo
yikuthi abantu laba bazakube be broadcaster i content enjani?. Bazabe
be broadcaster yini icontent etshiyeneyo esingayijwayelanaga eyenza
ukuthi umuntu wonke weZimbabwe ekwanise ukuthola into emchazayo
kuTelevision?. "
Abenhlanganiso elwela ilungelo lentathelizindaba ezisacathulayo eye
Young Journalists Association Zimbabwe - YOJA labo bathi lanxa
belemukela lelinyathelo elithethwe nguhulumende, kabasuthiswa yindlela
akhethe ngayo abaphumelele ukuthola amaliyisensi.
Isikhulumeli seYOJA u Leopold Munhende uchasisa ngokungasuthiseki
kwabo njengenhlanganiso.
"Okokuqala yikuthi abantu laba abanikwe ama license, amankampani la
anikwe ama license, kukhanya ngamankampani avele elama layisensi, kumbe ngawamaphepha kumbe amaRadio Station. Njalo thina besicabanga ukuthi iBAZ izafuna layo ukuthi kube lotshintsho esikhiweni abayithi yi diversity, ukuthi ama views abe etshiyene, benike abanye labo abangela
amalicense. Okunye yikuthi, kungani kuyasoleka ukuthi abantu laba
abanikwe amalicense, amankampani lawa anikwe ama license, angani
alobudlelwano lohulumende kumbe lebandla elibusayo ele Zanu Pf. Lokho,
thina sithi ungani kuyasisolisa, siyakhonona. Besicela ukuthi nxa
sekusenziwa lokhu, sekuphindwa njalo, bezame ukunika amanye
amankampani kumbe abanye abantu abangela budlelwano obaziwayo leZanu Pf kumbe lohulumende."
Kwasekelwa ngenye ingcwethi ecubungula ezombusazwe kanye lenhlalakahle kazulu umnumzana Tjenesani Ntungakwa.
"I six le ekhulunywayo le, singakhangele kuthiwe kuletshumi lane,
izititshi kumbeni ezazibhalele izingcwadi ukuthi zithole ithuba leli.
Singakwazi ukuthi zonezo ezingu six, sikhethwe ngayiphi indlela?.
Singakwazi ukuthi udaba lolu lwenzelwa ukuthi kumbeni kusasa sithi
uhulumende uqondile kumbeni hatshi?. Mina ma kuyikuthi kumbeni
kukhulunywa ngokuthi khona amagagasi sevulwa, ukuthi umuntu wonke
engene, akube lendlela ezokwenza ukuthi umuntu wonke ezwisise ukuthi
kuhamba njani. Lakho izimali lezi ezifunakalayo ezokubhadala ama
layisenzi ankhona, zingacina zitholakala ngabalutshwana. "
Abe BAZ bathi amankampani ayisithupha asetholiswe amalicense okusakaza
kumele abe esemoyeni phakathi kwenyanga ezingaba ngumnyaka
lengxenye-18 months. Nxa bengasasungulanga umsebenzi phakathi kwaleso
sikhathi belakho ukuwathathelwa anikezwe abanye.