amalinks wokungena

Breaking News

Ikhansili Yako Bulawayo Yethula Inhlelo Zamanzi Lokubutha Ingcekeza


Bulawayo Water
Bulawayo Water

Abekhansili yakoBulawayo babhode idolobho lonke ngoLwesihlanu betshengisa aMakhansila lentathelizindaba inhlelo abazenzayo phansi kweBulawayo Water and Sewerage Services Improvement Projects lokulimukisa uzulu ngesimo sesilinganiso samanzi asedolobheni, inhlelo ezikhona kanye lohlupho lokusilela kwawo.

Amakhansila akoBulawayo lentathelizindaba betshengiswa umsebenzi wamanzi kuleli dolobho
Amakhansila akoBulawayo lentathelizindaba betshengiswa umsebenzi wamanzi kuleli dolobho

UBulawayo ubhekane lodubo lokusilela kwamanzi okubangele ukuba ikhansili yabele amanzi evalwa ngezinye zezikhathi. Okwamanje abakamanisimpala bavulele uzulu amanzi kuze kube yiviki ezayo kusiya ngokuthi abantu bawasebenzisa ngonanzelelo.

UManjinela weKhansili yakoBulawayo, uNkosikazi Mercy Ncube uchasise ngomumo okhona okwamanje.


"Amanzi awasekho phakathi kwamadamu ethu ayisithupha sekusebenza amahlanu iUpper Ncema ayiselamanzi, uMnzinwane sikhangelele ukuma ukumsebenzisa NgoLwezi. Sizama ukutshela abantu ukuthi basebenzise amanzi ngonanzelelo khathesi abantu basebenzisa 150-170 ML ngelanga kodwa sikhangelele ukuthi basebenzise kusukela ku120ML ngelanga kusiya ku130ML ukuze sifikise isikhathi sezulu ngala manzi esilawo, sicela abantu basebenzise amanzi ngonanzelelo. ''

UMsekeli wekhomithi kamgcinisihlalo weFuture Water, uKhansila Sikhululekile Moyo ukhuthaze izakhamizi ukuba zilondoloze amanzi.

“Uhlelo lokulunisa injini lamanzi luqhubekela phambili lingamali sesivala amanzi okwamanje sivulile ukuthi sibone ukuba okulungisiweyo kusebenza kahle sisazovala njalo amanzi NgoLwezi laNgoNhlangula kumnyaka ozayo sikhupha injini lempompi ezindala sifaka ezintsha.Sicela uzulu aphathe kuhle amanzi awalondoloze.''

Umphathintambo wedolobho lakoBulawayo uNkosikazi Judith Ncube uncome ikhansili yedolobho lakoBulawayo ngemizamo eyenzayo ukulungisisa udubo lwamanzi.

Umpathintambo wakoBulawayo uNkosikazi Judith Ncube
Umpathintambo wakoBulawayo uNkosikazi Judith Ncube

“Abantu bengasebenza ndawonye kuzakuba lula, asibambeni

kuhle abantu bengadlalisi amanzi sinawaphatha kuhle sizafika isikhathi sezulu sinatha sieza. Ngicela uzulu ukuba alondoloze amanzi asebenzise isilinganiso esihlelwe ngomanjinela ukuze amadamu ethu engapheli amanzi."

Isakhamuzi sakoBulawayo, umnumzana Munyaradzi Phiri uthi kuWard 23 abala zibholane ngakhoke baphila nzima.

“Ngihlala eNkulumane kuWard 23, amaborehole akhona kwezinye indawo kwezinye akula, abantu bahamba imango emide bedinga amanzi .Kulawo asebenzayo awasebenzi kuhle njalo labantu abakhulileyo bayehluleka ukuwasebenzisa. Sicela ukuthi ikhansili isigebhele amaborehole ilunise lafileyo ukuze abantu bathole amanzi."

Bulawayo Water
Bulawayo Water



Esinye njalo isakhamuzi seRichmond, uRev Frank Mhlanga uthi kulempompi evuzayo duzane lomuzi wakhe esilamaviki athile ingalungiswanga.

“Ngihlala eRichmond kulempompi ezinengi ezivuzayo, phambi kwegedi lami kulempompi esilenyanga lamalanga ivuza. Sengafaka umbiko eBCC Call Centre baze bangipha lenombolo yokubeka umbiko. Njengoba amanzi ehlupha kabazame ukulungisa basebenze silondoloze umuzi wethu wakoBulawayo."

Kulandela ukungani kahle kwezulu ngomnyaka odluleyo, ikhansili yakoBulawayo ibhekane lodubo lokusilela okukhulu kwamanzi emadamu okwamanje akusilanganiso sokungamatshumi amane lane ekhulwini-44%.
Idamu leUpper Ncema lama ukusebenza NgoNhlangula kuthi Umzingwane uzacina ukusebenza NgoLwezi kodwa ulamanzi akusilinganiso setshumi lasikhombisa ekhulwini.

UBulawayo ulahlekelwa ngamanzi ngenxa yempompi ezivuzayo ngoba kulabomanjinela abalungisa impompi abangaphansi kwetshumi abakhangela impompi ezivuzayo idolobho lonke.

Idolobho lilezibholane ezingamakhulu amathathu lamatshumi amathathu lane asebenzayo kuthi alitshumi lanhlanu awasebenzi.

Kusenjalo, UMayor wedolobho lakoBulawayo, uMnu Solomon Mguni uthethe leli thuba lokuchasisa kabanzi ngequla lekhomishini esuke ewofisini kamphathintambo wembuso yezabelo eyathunyelwa ngenyanga edluleyo ukuzohlolisisa ingxabanxoza eqhamuke kuleli dolobho ngemva kokuxotshwa umsebenzi kukamabhalani omkhulu, uTown Clerk, ebikwa iphendukile ngaliviki.

“Ukuphenduka baphendukile kodwa angizange ngibelethuba lokuhlangana labo ngesikhathi bekhona esingakutsho yikuthi bekungabe kukhona okwasalelayo ekucubunuleni kwabo kodwa okwamanje sebebuyele sesilinde impumela yeinvestigation yabo. Besikhangelele ukuthi uMinister abe esephiwe ireport lamhlanje singazi ukuthi ubezayikhupha lamhlanje kumbe nini kodwa engasengikuzwile yikuthi lamhlanje bekumele ebe eseyitholile lamhlanje."

UMayor wako Bulawayo, uMnu. Solomon Mguni
UMayor wako Bulawayo, uMnu. Solomon Mguni

Phakathi kwamaviki amathathu edluleyo kube lokuxokozela lokufuthelana kuphoselanwa amazwi amabi phakathi kukamsekeli kaMayor, uMnu. Tinashe Kambarami, loTown Clerk umnumzana Christopher Dube ecalwa ngokungaphathi kuhle umsebenzi kanye lokuphatheka kunkohlakalo wamlobela incwadi yokumxotsha umsebenzi, bakhiya lewofisi yakhe bathatha amakhiye.

Lokhu kubangele ukuxokozela lokufuthelana edolobheni leli, abanye besekela uDube bethi engaxotshwa umsebenzi lwacina udaba lwankona solungasakhanyi ukuthi ngolokuxasana ngemihlobo kumbe ngezombusazwe okwenze uhulumende athumele iqula ukuzophenya imbangela yokuxokozela ko Bulawayo. Leli qula lugqibe uphenyo lolu labuyela eHarare, kodwa abakwazi ngokwenzakalayo bathi leli qula liphinde laphenduka ngayonale iviki.

please wait

No media source currently available

0:00 0:03:12 0:00
XS
SM
MD
LG