Asebekhulile abayizakhamizi zemizini yeMabvuku leTafara eHarare batshaya phansi ngenduku besithi bazovotela inkokheli ezinikeleyo ukusebenzela uzulu kukhetho lwalonyaka kungakhathelekile ukuthi ngeyaliphi ibandla njengalokho akade bekwenza eminyakeni edlule.
Lokhu kuphume komunye wemihlangano eqhutshwa ngabenhlanganiso ebona ngelungelo lezakhamizi eye Harare Residents Trust – HRT, yokukhulumisana ngokubhalisela ukuvota kukhetho oluzayo lokufundisana ngelungelo labantu lokuyahlola ugwalo lwamagama abale lungelo lokuvota i-voter’s roll.
Omunye wabangene eminye yalemihlangano owenzelwe endaweni eyaziwa ngokuthi Area “ D ” Community Centre, ngugogo uGloria Nyathi.
UNkosikazi Nyathi oleminyaka engamatshumi ayisithupha lanhlanu yokuzalwa- 65, uthi lonyaka kumele kukhethwe inkokheli kukhangelwa imbali lemisebenzi yayo emizini le hatshi ngoba ngowebandla elithize.
Uthi kunje uphila nzima, ngoba usekhulile njalo sekusengezwa yikuba buthakathaka emzimeni ngemva kokulimala kwakhe engozini yokutshaywa yimota ngomnyaka ka 2016.
Uthi kalukho losizo alutholayo oluvela kunkokheli endaweni lapho ahlala khona, kungakho esithi kumqoka ukuba kukhethwe inkokheli elozwelo yokusebenzela uzulu lokunakekela asebekhulile njengaye labakhubazekileyo.
Kwasekelwa ngugogo Idah Banda ongummfelokazi oleminyaka engamatshumi ayisificaminwe mibili-80 yokuzalwa, eyisakhamuzi semzini we New Mabvuku.
Yenake uthi ulethemba lokuba kuzakuba nganeno kuye labanjengaye kungangena inkokheli ekhethwa ngekwenzela uzulu.
Eyinye yenkokheli enhlanganisweni ye HRT esebenzisana lozulu we Sunningdale e Harare, uNkosazana Portia Chando ulandisa ngokuba kungani kumqoka ukuba izakhamizi zikhethe inkokheli uqobo ezobasebenzela.
Okhokhela uhlangothi olubona ngezokutholisa uzulu imfundiso, uMnu. Solomon Bobosibunu, wenhlanganiso ye Election Resource Centre, ugcizelela lumbono.
Asebekhulile laba bathi sebediniwe yinkokheli ebathembisa uzulu lomhlaba kungekho ekwenzayo ukunakekela uzulu lapho isingene esikhundleni.
