amalinks wokungena

Breaking News

AbeHealth Services Board Baxotsha Abaholi Bezibhedlela Ezinhlanu Zikahulumende.


Health Services Board

Ingcwethi zezempilakahle zixwayisa uzulu weZimbabwe ukuba kumele abophe ziqine ngoba kusazoba nzima ukumelana lokukhuphuka kwenani labatholakala belegfikwne leCovid 19 elizweni. Okwethusayo zithi ngabantu asebetholakala belegcikwane leli bengazange bake baphume elizweni.

Lokhu kuza ngesikhathi uhlangothi lwezisebenzi zezempikahle olweHealth Services Board (HSB) soluxotshe abaholi bezibhedlela ezinhlanu zikahulumende.

Ukungena kwabantu bevela kwamanye amazwe besebenzisa izimota ezinkulu ezithwala impahla ngeyinye yembangela yokuqonga kwenani labantu ababanjwa beleCovid 19 eZimbabwe kanye lokuyekethiswa kweziqondiso ze lockdown, kubika ingcwethi zeempilakahle.

Imihlangano efana lezinkonzo isivunyelwa kodwa kulabantu abamangamatshumi amahlanu kuphela okumele babe beqhoke ama mask njalo bengaminyezelananga.

Loba nje abantu kungafuzanga baminyezelane, inengi likazulu ligada amabhasi ka hulumende awe ZUPCO wona athwala abantu beminyezelene njalo abantu beqeda isikhathi esinengi besendwendweni okwenza babe lamathuba okuthelelana lumkhuhlane.

UDokotela Garry Shava uthi ngendlela inani labantu abalomkhuhlane lo eselikhuphuka ngalo sokumele uzulu azibonele yedwa ukuzivikela kulumkhuhlane kungasadingi hulumende yedwa ukulwisana lawo.

“Siyananzelela ukuba ama cases awe covid 19 asengezelela. Sokulabantu abanengi abalomkhuhlane we corona. Nxa ungananzelela ama cases ayemalutshwane kodwa kuthe uhulumende esethukulula iziqondiso ze lockdwon ama cases asesengezelela”

Uqhubeke esithi uzulu kumele uhulumende alandele iziqondiso zenhlanganiso yomanyano wamzwe womhlaba eye World Health Organisation (WHO) engaziyekethisi ngoba umumo ulakho ukuba mubi okweinga eliphezulu.

“Abantu sebethe badedela ukuzivikela. Abantu sebethe bayehlisa esingathi zindlela zokuzivikela. Inkuthazo ekhona yikuba umkhuhlane akukayi ndawo ungaba khona okweminyaka emibili emithathathu. Okukhona yikuba abantu kasisigcineni kasihlaleni sigeza izandla”

Lokhu kusekelwe ngu Dokotela Henry Madzorera owake waba ngumpathintambo wezempilakahle kuhulumende womanyano, yena othi ele Zimbabwe kumele lithole izifundo emazweni asehlaselwe kakhulu ngu mkhuhlane lo ngoba sekufe abantu abanengi.

“Indlela lumkhuhlane okhula ngayo uyadanisa. Lokhu kutsho ukuba abantu bathathe indlela ezinengi zokuzugcina. Kumele sigeze izandla, sibone ukuba kasiminyezelani lokuba kasihamba hambi emakhaya loba emadolobheni”

Kungalesi sikhathi umonakalo weCovid 19, usiba mubi ngamandla, uhlangothi olubona ngezisebenzi zikahulumende olwe Health Services Board (HSB) seluxotshe abaholi abahlanu bezibhedlela zikahulumende.

Abahlanu laba bathi Mnu Ernest Manyawu owe Parirenyatwa, Dr Tinashe Dhobbie owe Sally Mugabe Central, uDr Enock Mayida owe Chitungwiza Central uNkosikazi Nonhlanhla Ndlovu owe UBH lo Mnu Leonaerd Mabhandi owe Ngutsheni.

Ingcitshi kwezempilakahle, uMnu Mlungisi Dube uthi lokhu kuveza ukuba uhulumende kazimiselanga ukuvuma lapho aphambanisa khona kodwa ufuna ukudinga abantu angababethela evika ngabo.

“Udubo luse Ministry of health lapho okulabantu abatshontshayo. Sikhuluma kunje into eyodwa enza ukuba oMongikazi laboDokotela bengasebenzi kungenxa yokuba baphiwa imali engeneliyo"

UMnu Paulinas Sikhosana umgcinisihlalo we HSB utshele iphephandaba le Herald ukuba ukuxotshwa kwalezi iphathamandla kwenziwe ngenjongo yokuguqula lokuthuthukisa ukusebenza kogatsha lwezempilakahle lezibhedlela zikahulumende.

Emcabangweni wokubuyela kuLockdown okuke kwathintwa nguMongameli Emmerson Mnangagwa ngeviki edluleyo, ikakhulu emadolobheni amakhulu anjenge Harare le Bulawayo ingcwethi zezempilakahle zithi leli nyathelo lingaphumelela kuphela kungaba lokusebenzelana lokucebisana kukahulumende lozulu. Zithi njalo ukubuyela kuLockdown kunela lokhu kucebisana akusoze kuncede uzulu kungahle kwengeze inhlupho ezibhekane Labantu njengoba inengi labo elizweni jikelele lingaqatshwanga kodwa lizisebenza.

Facebook Forum

XS
SM
MD
LG