amalinks wokungena

Breaking News

AbeLaw Society of Zimbabwe Basola Ukubotshwa kukaMnu Thabani Mpofu


Law Society of Zimbabwe

Abenhlanganiso yamaqgwetha eye Law Society of Zimbabwe bayakusola kakhulu ukubotshwa kwegqwetha elilodumo uMnu Thabani Mpofu besithi le, yimizamo yokumethusela yena lamanye amaqwetha elizweni.

UMpofu ubotshwe ngoMvulo walala evalelwe enkambeni yamapholisa eyeRhodesville, eHarare, esetheswa icala lokuloba ibizo lomuntu ongekhoyo kubufakazi bake beAfdavit ayisebenzise emthethwandaba owe High Court.

AbeLaw Society of Zimbabwe bathi akukho emthethweni ukuba igqwetha libotshelwe okuyabe kuphambaniseke kokulotshwe emaphepheni awemthethwandaba.

Incwadi elotshwe ngamapholisa izolo isitsho amacala ka Mpofu ithi uphambanise ngokufaka iAfdavit elebizo lomuntu ongazakaliyo.

Kodwa igqwetha lakhe uNkosikazi Beatrice Mtetwa uyakulandula lokhu esithi ngamanga.

“Indaba ka Advocate Mpofu ngeyokuthi waletha udaba luka Simbarashe Zuze, abathi kakulamuntu onjalo. Akusiqiniso lokhu ngoba kwahlolisiswa yi Law Society of Zimbabwe le Law and Order Section yama pholisa ngomnyaka ophelileyo. UZuze lo sakhuluma laye bezwa ukuba ngempela ukhona, kuyasimangalisa ukuba kungani sebemdinga khathesi”

UMtetwa uqhubeke ethi okwenzakala ku Mpofu yikwephulwa kwamalungelo amaqwetha ngoba umsebenzi wabo kawumelanga uphanjaniswe ngamapholisa.

“Njenge Advocate basebenza lama lawyer. Batshelwa ngama attorney umsebenzi wabo. Kuyamangalisa ukuba waletha ibizo lomuntu ongekhoyo. Bathi wasebenzisa iaafdvit elomuntu ongekheyo, nxa kwenzakala lokhu igqwetha liyavunyelwa ukuba lilungisise amaphepha alo”

Okhokhela inhlanganiso ye Law Society of Zimbabwe uMnu Thabiso Masiye uthi kumele amalungelo amaqwetha akusisekelo sombuso ahlonitshwe.

“Sihlukumezekile kakhulu ngokubotshwa kuka Advocate Mpofu. Siyakhumbuzana ukuba ngaphansi kwe UN, SADC lakuleli amagqwetha ayavunyelwa ukwenza umsebenzi. Akukho emthethweni ukuba bahlukunyezwe nxa besenza umsebenzi”

UMpofu waziwa ngabanengi ngokumela ibandla le MDC Alliance ikakhulu kudaba lokungaqhutshw kuhle kokhetho lomnyaka ka 2018.

Olwela amalungelo oluntu uMnu Pride Mkono uthi kuyisimanga ukuba amaqwetha asebotshelwa udaba olunjengalolu.

“UKubotshwa kuka Mnu Thabani, ungabona ebotshwa kutsho ukuba abantukazana nje, bengeziwa okubi kulalokhu nxa bezafuna ukutshengisela amalungelo abo. Kutshengisa ukuba uhulumende kalasineki ngamalungelo abantu”

Imizamo yokuthola umbono kahulumende ngaloludaba yehlule ngoba umpathintambo wezokwethulwa kwemibiko uNkosikazi Monica Mutsvangwa ube engasabeli ucingo lwakhe.

Ngesikhathi iStudio 7 isiya emoyeni uMpofu ube elokhe engakamiswa phambi komthethwandaba, amaqwetha eZimbabwe Lawyers for Human Rights ebika ukuba amapholisa akhanya ebe engalungiselelanga loludaba.

Facebook Forum

XS
SM
MD
LG