amalinks wokungena

Breaking News

AbeMandebeleni Baveza Imibono Ehlukileyo Ngequla LakweleSouth Africa Ele-ANC


Ibandla elibusayo kweleSouth Africa eleAfrican National Congress

Abalwela amalungelo oluntu koBulawayo baveza imibono ehlukeneyo ngabakukhangelele kuqula elivela kweleSouth Africa elebandla leANC elifike Ngolwesibili, eZimbabwe ,ukuzocwayisisa ngemibiko ethi umumo awumanga kuhle elizweni leli leyokwephulwa kwelungelo loluntu, abantu bebotshwa mahlayana lokuthunjwa ikakhulu abangaboni ngaso linye lohulumende kaMongameli Emmerson Mnangagwa.

UMongameli weMRP, uMnu Mqondisi Moyo uthi bakhangelele ukuba abequla leli baze emhlubulweni weMaNdebeleni bazozizwela inhlupho ababhekane lazo njengoba iqula lakuqala elathunyelwa nguMongameli Cyril Ramaphosa laphelela eHarare likhulumisane loMongameli Emmerson Mnangagwa kuphela.

“Esikukhangelelyo kuqula elivela eSouth Africa yikuba baze eMaNdebeleni bazezizwela inhlupho ababhekane lazo kusukela ngomnyaka ka1980 ezibangelwa yisigodlo ngoba inhlupho ezibhekane lathi koMthwakazi zihlukile lezeZimbabwe njalo zibangelwa ngumbuso osesigodlweni. Sicela ukuba iqula leli libe ngumlamlankuzi oqotho hatshi ebesikubona kuminyaka edlule.”

Olwela amalungelo oluntu uNkosazana Cora Ndebele uthi iqula leli kumele lihlangane lazozonke inhlangothi zempilo ukuze inhlupho ezibhekane lozulu ezweni zitholelwe isisombululo.

“Iqula leli lihlangane lenhlanganiso zonke zakuleli kube lokukhulumisana akuhle, ukuhlukuluzwa kukazulu ngabezomvikela , uhulumende lebutho kwehle njalo thina ngapha eMaNdebeleni singathi siyakhethwa ngakho leliqula kumele libone ukuba konke kuyalunga laye uhulumende ekhulule izandla zakhe esomileyo ebantwini.”

Olwela amalungelo abathengi uMnu Michael Ndiweni uvumelane loNdebele ethi bakafinyelele leMaNdebeleni ukuze bathole imibono ehlala isalela kunkulumo ezedlule.

“Iqula elivela eSouth Africa, kumele livule amaphiko azo lize leMaNdebeleni libone abantu bonke lenhlanganiso ezimele uzulu ukuze bazwe eminye imibono ehlala isala emaceleni uma kube lenkulumo ezifana lazoneni ngoba okwamanje ingathi inkulumo zigxile esigodlweni ezinye izigaba zelizwe zingakhuphanga eyazo imibono.”

Kunyanga edlule kulequla elikelabuya ezweni lithunywe nguMongameli Cyril Ramaphosa wakweleSouth Africa eliphelele ekuhlanganeni loMongameli Emmerson Mnangagwa laphindela kibo ngemva kokwaziswa nguhulumende ukuba akulanhlupho ezweni lahle latshiyana lokuhlangana labamanye amabandla aphikisayo njengokwethembisa kwalo. Abamacele womabili aweMDC batshona belinde ukuhlangana laleli qula ekuzeni kwalo ngoNcwabakazi kodwa kaligcwalisanga leso sithembiso.

Leliqula elibunjwa ngabebandla eleANC lalo lithembise ukuhlangana labenhlanganiso ezehlukeneyo eZimbabwe labeZanu PF. Yona iZanu PF, yiyo esikhiphe imibiko yokwazisa ukuba iqula eleANC liza ukuzohlangana labo kuphela hatshi intathelizindaba lezinye ihlanganiso loba amabandla aphikisayo. Limibiko itshiye abantu sebethithibele sebemelele ukuthi babone ukuba izozala nkomoni njengoba sokuphuma imibiko ekhanya iphikisana lohambo lwaleli qula.

Facebook Forum

XS
SM
MD
LG