amalinks wokungena

Breaking News

AbeMDC Alliance Batshengisela kweleBotswana Lapho Kunanzwa iAnti-Sanctions Day


AbeMDC Alliance betshengisela kweleBotswana

Amalunga awebandla eliphikisayo ele Movement for Democratic Change Alliance, atshengisele ehofisini yommeli weZimbabwe eGaborone NgoMvulo lapho okukade kunanzwa ilanga elabekwa ngumanyano wamazwe angezansi kwezwekzi leAfrica lokukhuthaza ukwesulwa kwezijeziso zenotho, eleSADC Anti-Santions Day.

Abalihlekana abebandla leMDC Alliance batshengisele phandle kwehofisi yommeli weZimbabwe kweleBotswana, besithi ukubhidlika komnotho eZimbabwe akubangwa yizijeziso zomnotho, kodwa inkohlakalo kanye lokungahlonitshwa kwelungelo loluntu.

AbeMDC Alliance betshengisela kweleBotswana
AbeMDC Alliance betshengisela kweleBotswana

Lokhu kwenzakale ngesikhathi kulabahlonitshwa, abagoqela abammeli bamazwe afana leAngola, China, Mozambique, Russia, Saharawi Republic leSouth Africa, abakade besemkhosini wosuku lweSADC Anti-Sanctions Day.

Unobhala jikelele wogatsha lweMDC Alliance kweleBotswana, umnunzana Taurai Mavhoko uthi kabavumelani lombono wokuthi izijeziso zomnotho yizo esezibhidlize inhlalakahle kazulu eZimbabwe.

“Thina njengama Concerned Citizens sithi uhulumende weZimbabwe uzenza yena ohlukunyezwayo kukanti nguye ohlukumezayo. Kumele baguqule indlela abenza ngayo ukuze kwesulwe izijeziso.”

Kodwa ummeli weZimbabwe kweleBotswana, umnunzana Henry Mukunoweshuro kakutshayanga ndiva ukutshengisela kwabeMDC Alliance esithi kumgceke ukuthi inengi livumelana lokuthi izijeziso zenotho zesulwe. Njalo uthi uhulumende weZimbabwe usendleleni ukuzama ukulungisa lapho okungabe kwaphambaniseka khona.

“EleZimbabwe selenze imizamo ukuthi lilungise okunengi. Kunengi esekwenzakale okokuthi silethemba lokuthi labo abafaka izijeziso zomnotho, bazavuma labo ukuthi sisendleleni eqondileyo.”

Omela eleChina kweleBotswana, umnunzana Zhao Yanbo ufananise izijeziso zomnotho lamacala okuhlukuluza abantu.

“Khathesi siphakathi kokulwisana lomkhuhlane wecorona virus, izijeziso zomnotho zeziyenze kwabanzima ebantwini beZimbabwe. Lokhu kubi okwedlula amacala adalwa kulungelo loluntu.”

Abanye abeZimbabwe kweleBotswana, abafana lomnunzana Mthabisi Dube, bathi okuqakathekileyo yikuthi uhulumende kamongameli Emmerson Mnangagwa atshengise ngezenzo ukuthi kulenguquko engenza ukuthi izijeziso zomnotho ziyesulwe.

“Ukukhuluma kuphela akwenelanga. Kumele sibone ngezenzo uma uhulumende esithi sekukunengi okwenziweyo ukuthi kulungiswe lapho okonakele khona.”

Inkokheli yamazwe aweSADC
Inkokheli yamazwe aweSADC

Usuku olwe SADC Anti-Sanctions Day, luqoqwe ngabehofisi yommeli weZimbabwe kweleBotswana, besithi lizaqhubeka linanzwa, zize zesulwe izijeziso lezi.

Lanxa uhulumende weZimbabwe esithi lezi zijeziso ezethulelwa ezinye iziphathamandla zeZanu PF ezikuhulumende lamankampani adlelana lazo aphatheke kunkohlakalo yiMelika lamazwe aweEuropean Union, yizo esezibulele umnotho welizwe ummeli weMelika eZimbabwe, uMnu. Brian Nichols kanye lommeli weBhilithani uNkosikazi Melanie Robinson bathi udaba lokwephulwa kwelungelo loluntu lolwenkohlakalo yikho osokubulele umnotho weZimbabwe, izisebenzi kunhlangothi eziqakathekileyo zempilo zikhalala umsebenzi okwenza osomabhizimusi bakwamanye amazwe banyampe inhliziyo ukuzotshala imali elizweni.

Facebook Forum

XS
SM
MD
LG