amalinks wokungena

Breaking News

Misa Zimbabwe: Bakhonona Ngemithetho Ephathelane Lokusebenza Kwentathelizindaba


Misa- Zimbabwe

Inhlanganiso ebona ngokulondolozwa kwamalungelo entathelizindaba eye Misa Zimbabwe ithi noma isisekelo sombuso esitsha sinikeza abezindaba labantu makhaza amalungelo athile kunengi okulokhe kusenziwa ngendlela ephazamisa ukugcwaliseka kwamalungelo la noma emi ngendlela ecacileyo kulesi sisekelo.

Umqondisi we Misa Zimbabwe umnumzana Nhlanhla Ngwenya utshele umhlangano wamalungelo abezindaba emahofisini obudlelwano besigodlo seleMelika lozulu eZimbabwe ukuba noma isisekelo selizwe siwabeka mgceke amalungelo la, lokhe kulemithetho efana le Defence Act, AIPPA, Police Act, Universities Act, Criminal Law Code lomthetho omutsha olungiswayo ozahlola ezenzakala ebulenjini athi abavumelani lawo.

Umnumzana Thuthani Moyo wenhlanganiso ye Zimcachenet ongene laye lumhlangano uthi umthetho onje uncindezela amalungelo kazulu ngoba umuntu wonke ezalwa elembono yakhe okumele ayiveze ekhululekile nxa lokhu ekwenza engathethisi abanye abantu kumbe ukudala amacala.

UNgwenya uthi umthetho onje kunye lodaba lokuba uhulumende umele abe nguye oqondisa inhlanganiso zezindaba zesizwe kunye lokubeka iBoard ejezisa intathelizindaba, kuphazamisa indlela abezindaba abangasebenza ngayo bekhululekile ethi uhulumende kamelanga aphathe lindima, iphathwe yizo intathelizindaba okumele zijezisane zona zodwa nxa zithe zephula iziqondiso zokusebenza kwazo iCode of Ethics, njengalokho okwenziwe ngodokothela lamagqwetha.

UMoyo uthi noma ohulumende bebhekana lenkinga zabahlamuki lenhlanganiso ezifana le ISIS uhulumende ulezinye indlela angazisebenzisa kulokuhlola okwenziwa ngabantu ebulenjini beInternet.

UNgwenya uthi sokudingakala ukuba enze okokuboniswa ngobuhle bokunikeza abantu amalungelo abo njalo kuhlolisiswe isisekelo sonke lemithetho yonke okumele iguqulwe ukuze ihambelane laso, kulokukhangela ezezindaba kuphela njalo kulokusebenzelana okugcweleyo lozulu kundawana ezitshiyeneyo. Esithi udubo olukhona yikuba uhulumende ukhanya engakabi laso isifiso sokulungisisa imithetho le ngokuphangisa.

Uthi kuqakathekile ukuba kuhlolisiswe njalo ugatsha lokwethulwa kwemithetho kuhulumende lendlela olusebenza ngayo lokuba kuphathisa kanjani ukukhululeka kwenhlanganiso zezindaba.

Ele Zimbabwe limanyene lamanye amazwe omhlaba ekunanzeni ilanga lokuqakathekiswa kokusebenza kwenhlanganiso zezindaba zikhululekile ngempelansonto, ele World Press Freedom Day.

XS
SM
MD
LG