amalinks wokungena

Breaking News

NAC: Inani Labantu Asebenatha Amaphilisi Okwehlisa Igcikwane Lengculaza Liyaqonga


Amaphilisi aweTruvada athathwa ngabaphila legcikwane lengculaza ele HIV
Amaphilisi aweTruvada athathwa ngabaphila legcikwane lengculaza ele HIV

Inhlanganiso eye NAC ithi inani labantu abanatha amaphilisi okwehlisa igcikwane lengculaza emzimbeni koBulawayo seliqansile.

Lokhu kuphume ekwethulweni kwempumela yokuqhutshwa kwenhlelo zokulwisana legcikwane leHIV eZimbabwe iNAC ikhangele izigaba ezehlukeneyo.

Lokhu kugoqela ukuhlolwa kwegcikwane kwabomama abazithweleyo labomkabo, imikhuhlane yengulamakwa, ukusentshenziswa kwejazi likamkhwenyana, ukumemetheka kwegcikwane leHIV kwabasakhulayo, ukutholwa kwamaphilisi ehlisa igcikwane emzimbeni (ART) kanye lokusokwa kwabesilisa.

Okumqoka phakathi kwempumela le eyethulwe yiNAC yikuthi inani labomama abahlolwa igcikwane liqansile laloba behlolwa bengela bomkabo.

Ngomnyaka ka 2017 inani labomama abahloliweyo koBulawayo baphose babe zinkulungwane ezilitshumi (9,862), kuthi obaba abahlolwa ngesikhathi omama bekhulelwe bazinkulungwane phose ezimbili -1,852.

Ekhuluma lentathelizindaba koBulawayo osebenza leNAC, uMnu. Douglas Moyo, uthe ngomnyaka ka2017 kube labantu abagula imikhuhlane yengulamakwa abazinkulungwane phose ezilitshumi - 9,846, okutshengisa ukuthi iqansile nxa kuqathaniswa lomnyaka ka 2016 okwaba labantu abaphezu kwenkulungwane ezithoba minwe mibili - (8,419).

Uthe ubunengi benani labantu abalemikhuhlane le kuyibufakazi bokuthi abantu abakhuthaleli ukuzivikela nxa besiya emacansini.

UMoyo uthe abantu bavame ukuphambanisa ukusebenzisa amaphilisi anathwa kuzanywa ukuvikela igcikwane leHIV awe Pre-exposure prophylaxis (PrEP) lawe PEP.

UMoyo uthe njalo inani labasakhulayo abalegcikwane liyaqansa kakhulu ethi lokhu kulusizi ngoba yibo abakhangelelwe ukuba zinkokheli zakusasa.

Umama okhulelweyo, uNkosikazi Similo Hlazo, uthe kunzima ukuthi obaba bayehlolwa igcikwane leHIV wagcizelela esithi bakhetha ukubona impumela zabomkabo.

UMnu. Thandazani Nkomo laye uthe kuyadondisa ukuyahlolwa igcikwane njalo bayesaba ukuyadinga indwangu entabeni.

Okunye okuvezwe yiNAC yikuthi ukusetshenziswa kwejazi likamkhwenyana kubomama lakubobaba kuqansile ngamatshumi amabili lesithupha 26% kubobaba kuthi awabomama ngetshumi lasithupha 16%.

Bathi ukuqansa lokhu kubangelwe yikusebenza nzima kwe nhlanganiso yeZimbabwe National Family Planning Council.

please wait

No media source currently available

0:00 0:04:52 0:00
XS
SM
MD
LG