amalinks wokungena

Breaking News

AbeRugare CCAP Bathakazelela Ukufikisa Iminyaka Engamatshumi Amahlanu


Rugare CCAP Golden Jubilee

Ummeli eMalawi eZimbabwe, uNkosikazi Anne Kumwenda uncoma imithetho yalelo lizwe evumela abantu ukukhonza inkolo ezehlukeneyo abazikhethayo, esithi ngoba akunjalo kwamanye amazwe lapho ohulumende abahle bakubeke sobala ukuthi kulokholo olulodwa kuphela olungalandelwa.

Utsho lamazwi emkhosini wokuthakazelela ukufikisa iminyaka engamatshumi amahlanu selokhu ibandla lokholo lwesiKristu eleRugare CCAP lasungulwayo eHarare ngomnyaka ka 1971 abayithi yiGolden Jubille.

Ummeli weMalawi eZimbabwe uAmbassador Anne Kumwenda.
Ummeli weMalawi eZimbabwe uAmbassador Anne Kumwenda.

Ukutshengisa injabulo ekumanyaneni lamakholwa akulelibandla, uthethe ithuba laye unkosikazi Kumwenda ukukhokhela kwenye yengoma ebihlatshelwa kulo umkhosi owenzelwe emzini owakhelwa ababesebenza kuLoliwe oweRugare eHarare, lapho okulesakhiwo salelibandla leCCAP.

Unkosikazi Kumwenda ukhuthaze abangena lelibandla kuleli ukuba mabangabandlululi kulabo abafuna ukuba ngamalunga bengabakwamanye amazwe kanye labeZimbabwe.

“ Akulula ukukhonza kwamanye amzwe lapho okulemigoqo khona, ukuba lebandla labantu bokuza bekhonza kilo okweminyaka edlula amatshumi amahlanu. Kodwa siyazibonela lapha ukuba abantu balobudlelwano obuhle, silabavela eMalawi, silabavela eZambiya, abakhonza bendawonye besebenzisa yiloba yiluphi ulimi abalufunayo. Basebenzisa ulimi lwesiChewa, basebenzisa isiShona.”

Rugare CCAP Golden Jubilee
Rugare CCAP Golden Jubilee

Okusekelwe ngeyinye yenkokheli kulelibandla uDr Lamiel Phiri olabazali bakhe abadabuka eMalawi kodwa owazalelwa eZimbabwe.

“Thina sizibiza ngokuthi siyizizalwane zeSHALOM, kusitsho ukuba sisebenzisa indimi ezehlukeneyo. Silendimi zonke esizisebenzisayo ngoba amalunga ethu avela kumihlobo etshiyeneyo. Ngakho kumele bazwe bekhululekile lapho senkonzweni yikho sisenza ngendlela esenza ngayo.”

UDr Phiri wengeze esithi lokhu kuthakazelela ukufikisa iminyaka engamatshumi amahlanu kuzoqhubekela phambili okomnyaka wonke wonalo oka 2021.

Abethabe emanzi te, amakholwa angamalunga alelibandla leRugare CCAP ngokufikisa kwalelibandla iminyaka engamatshumi amahlanu.

Omunye wakhona kunguNkosikazi Alice Munthali ongumcebisi wabasakhulayo abangamantombazane.

“Ngizibona angani sengihambile vele ezulwini, sikhumbula labatshonayo, bakhona abaqalayo ukuyiyakha le ichurch, batshona, but siyabakhumbula labo. And njengokukholwa kwami ngeSonto leyi, iRugare CCAP, hayi, ngizwa kamanandi, ngizwa ngijabula kakhulu ukuthi uMlimu ukhona, iNkosi ikhona. Sithi iNkosi kayiqhubekele phambili ngenkonzo yethi, iRugare CCAP, iqhubekele phambili, ingabuyeli emuva, until siyefikisa iminyaka leminyaka, i100 years siyongena kuyo. ”

Rugare CCAP Golden Jubilee
Rugare CCAP Golden Jubilee

Osakhulayo ongunobhala eRugare CCAP uBernard Size uthi ubonga uNkulunkulu ukuba lifike esaphila lelilanga lapho ibandla akhonza kilo lifikise iminyaka engamatshumi amahlanu.

“Thina ama origins ethu, sisuka eMalawi but sibonga iZimbabwe, basivumela ukuthi sibuye lapha eZimbabwe sisuka eMalawi, basivumela ukuthi siyakhe amaChurch. Lamuhlanje siyadumisa uNkulunkulu silapha eRugare. Sibonga uNkulunkulu, iminyaka efika 50years. Fifty years kutsho ukuthi, 50 years sitshumayela, 50years abantu besiliswa, 50years abantu bebona ubukhulu bukaNkulunkulu. Thina asilawo amandla sisodwa, konke sikunikela kuNkulunkulu. ”

Owake waba nguNobhala ( General Secretary ) ebandleni leCCAP lapha eZimbabwe uMfundisi John Charles Juma uthi kumele siqakathekiswe isimo esikhona elizweni, esibavumela ukuthi bakhonze kuleli kumabandla abo awokuza njenge le CCAP.

Rugare CCAP Golden Jubilee
Rugare CCAP Golden Jubilee

“ Ekufikeni kwabantu beMalawi kuleli ngomnyaka ka1912, bazibona njengabantu abalahlekileyo, bahlangana lobunzima, kwaba nzima kibo ukuthi bakhonze ndawonye lozulu weZimbabwe. Basebebuyela kweleMalawi besiyadinga usizo kunkokheli zamabandla ukuthi bavunyelwe ukusungula elabo kuleli. Kwakumele uhulumende abatholise imvumo yokukwenza lokho. Uhulumende ngaleso sikhathi wakubona kufanele ukubapha leyomvumo endaweni lapho izizalwane zeMalawi zazitholakala khona.”

Ingakayakhiwa lindlu yokukhonzela yeRugare CCAP, uMfundisi Juma uthi abazalwane babehamba umango omude besiyakhonzela emzini weHighfields. Kuthe ngokwakhiwa kweleMufakose CCAP lakho babequma ngenyawo besiyakhonza khona kwaze kwathi elabo selakhiwe laqala ukusebenza ngomnyaka ka1971.

Rugare CCAP Golden Jubilee
Rugare CCAP Golden Jubilee

Isisekelo sombuzo weZimbabwe sikubeka sobala ukuba umuntu ukhululekile ukuba alandele ukholo aluthandayo yikho nje kulamabandla enkolo ezitshiyeneyo kuleli.

Uhulumende uthi lokhu kuhlezi kugcizelelwa ngumongameli Emmerson Mnangagwa lapho anxusa khona inkokheli yamabandla enkolo ezitshiyeneyo ukuzahlanganyela laye lapho eqhuba imisebenzi yokuthandazela ilizwe njengalowo awuphawule kunyanga ephelileyo owe “THANKSGIVING DAY”.

Bekuhaywa ingoma ezidumisa uMdali njalo ngendimi ezehlukeneyo ezibalisa, isiNgisi, isiShona, isiSwahili, isiChewa lezinye, kugiywa kujatshulwa ngesikhathi kuthakazelelwa ukufikisa iminyaka engamatshumi amahlanu ibandla leRugare CCAP Church lasungulwayo.

Udaba lweRugare CCAP Golden Jubilee siluphiwa nguMavis Gama
please wait

No media source currently available

0:00 0:03:56 0:00

Facebook Forum

XS
SM
MD
LG