amalinks wokungena

Breaking News

Abesifazana: Inengi Labadlwengulwayo Liyazithulela Ngoba Lisesaba Ukuya Emapholiseni


Abesifazane bathi lanxa bephiwa izigwebo ezilukhuni abadala amacala okuhlukuluza kanye lokudlwengula, lokhu kodwa akusoze kwaluqeda loludubo. Bathi sekudinga ukuba uzulu afundiswe ukuxoxisana ngendlela zokuzivikela kulokhu kuhlukuluzwa kusukela emakhaya, ezikolweni kanye lasemakolitshini, kubuyelwe emasikweni endulo abenakekela abesifazane kanye labantwana.

Ukuthula nxa kuthe kwaba khona okubi okwenzakalayo ubikwa ungumkhuba omubi okumele uqedqwe kutsho abesifazane. Bathi ukuthula umuntu esazi ukuba ukhona umonakalo okhona ekhaya kubikwa kungenye imbangela yokwanda kwendaba zokudlwengulwa kwabantwana labesifazane elizweni.

Unkosikazi Priscah Mufumira olilunga ledale le Sanate uthi bazimisele njengenkokheli ukuphathisa ekuthini ithuthukiswe imithetho ephezu kokuhlukuluzwa kwabesifazane elizweni.

Lokhu kodwa uthi ayisikho okungaluqeda loludaba lokuhlukuluzwa lokudlwengulwa kwabesifazane kodwa uzulu weZimbabwe laye kumele akhangele emuva lapho avela khona, awahlolisise amasiko esintu kakhulukazi imikhuba ebangela ukuqhela kwaloludubo okubalisa ukuthula lapho umuntu esazi ukuba lidaliwe icala lokudlwengulwa kowesifazane loba umntwana.

Lokhu kugcizelelwe ngunkosikazi Ellen Mazorodze yena oqhuba izifundo ze PHD e University ye Zimbabwe lapho ahlolisisa phezu kwaloludubo lokuhlukuluzwa kwabesifazane emakhaya ezikolo lasemakolitshini. Kunje uphatheke ekulotshweni kogwalo olukhangela indlela ezilokuhlakanipha, njengengxenye yezifundo zakhe, athi kazisetshenziswakuhle nxa kukhangelwa udubo lolu.

Ingcwethi zibika ukuba inengi lezahlakalo zokuhlukuluzwa kwabesifazane labantwana zenzakala kakhulu endaweni ezinjengemakhaya njalo kungabantu abalobuhlobo obuthize lomahlukuluza okubalisa omakhelwane lezihlobo.

U Sibongile Bhebhe wase Harare udlwengulwe ngumalumakhe ngesikhathi eleminyaka elitshumi lasithupha ngomnyaka ka2011 uselengane engelayise ngemva ngemva kwaleso sehlakalo.
Ungomunye wamantombazane asebehluleke ukuqhubekela phambili ngemfundo yabo ngemva kwalesi sehlakalo sokuhlukuluzwa lapho u Sibongile athi waswela loyedwa obengamphathisa ngaleso sikhathi lanxa walumangala udaba lwakhe kwabezomthetho.

Uzelwe esithenjini u Sibongile njalo unina omzalayo kanye loyise sebabhubha okuyikho okwamenza wayahlala komalume onguyena owaphetha esemhlukuluza njalo kungekho okwenziwa kuye lanxa kuludaba olwasiwa emapholiseni.

Uthi okumzwisa ubuhlungu yikuswelakala kowamzwela usizi ngesikhathi ebika phezu kokuhlukuluzwa lokudlwengulwa kwakhe lapho abekwa umlandu yena wokuba nguye owakubangeyo.

Inkokheli zesifazane zithi kunje kazikho indlela zokuphathisa abesifazane labantwana lapha emakhaya lasezikolo zemfundo yaphezulu ukuba banelise ukuzinakekela bazi amanyathelo okumele alandelwe nxa bethe bahlangana lezehlakalo zokuhlukuluzwa ngemva kokudlwengulwa.

Bakhankasela ukubunjwa kwendawo okuthiwa ngama ' Call Centres ' kuzo zonke izigaba ezikolweni ezingaphathisa ohlukuluziweyo ukuba ayethola usizo lokuba azi ukuba athathe manyathelo bani ukulubika udaba lwakhe.

Incgwethi zona zibika ukuba isilinganiso esedlula amatshumi ayisithupha ekhulwini sabahlukuluzwa ngokudlwengulwa ikakhulu abantwana, kuyilabo abahlukuluzwa yizinini kanye labomakhelwane.

Bathi lukhona njalo uhlangothi lwabesifazane laba abahlukuluzwa ngokudlwengulwa ngabantu ababaziyo okubalisa abablisi lapha ezikolweni zemfundo yaphezulu okunje ngamakolitshi lama university, emabandleni ezokholo kanye lalapho abasebenza khona.

Okudanisayo yikuba bayazithulela, okungumkhuba omubi okumele uqedwe lanxa ababhekana laloludubo beveza ukuba bayathula ngoba besesaba ukuba uzulu lezihlobo bazababeka umlandu wokuba yibo abakubangeleyo.
XS
SM
MD
LG