amalinks wokungena

Breaking News

Nkosikazi Graca Machel: Abesifazana Kabafunde Ukuphakamisana Kwezamabhizimusi


Umka muyi owaba ngumongameli wakuqala onsundu kwele South Africa, umnumzana Nelson Mandela, unkosikazi Graca Machel, ubese Zimbabwe kuliviki edluleyo, ukuzaphawula okusemthethweni inhlanganiso yabosomabhizimusi besifazane ezwekazi le Africa eye The Network of African Business Women (NABW).

Unkosikazi Machel ukhuthaze abesifazane bakuleli ukuba baphatheke ngokugcweleyo kundaba zokuthuthukiswa kwezomnotho, baqhube imisebenzi ezabathuthukisa kumabhizimusi ehlukeneyo.

Unkosikazi Machel uveze ukuba into eyenza abesifazane njengaye bangaze baphumelela kikho konke abakwenzayo kungenxa yokungamanyani lokusekelana ngakhoke kabafunde ukuphakamisana hatshi ukuncindezelana loba ukukhankasela ukuwa kwabanye babo.

Kudinga ukuba abesifazane bakhulume ngalizwi linye kutsho unkosikazi Machel othi ngoba nxa ungekho umanyano, kudonselanwa, kusethulwa imibono ehlukeneyo kubaphathintambo ngenhlangothi ezehlukeneyo, kwenza uhulumende adideke inqondo ngokuthi anganceda njani intuthuko yabesifazane.

Umgcinisihlalo we NABW eZimbabwe, unkosikazi Hazel Chinake, utshele intathelizindaba ukuba abesifazane bephatha umsebenzi omkhulu ekuthuthukiseni inotho yamazwe awezwekazi leAfrica.

Inengi labesifazane bahlangana lobunzima ngesikhathi befuna usizo lwezikwelede emabhanga ngoba bengela abangakunikeza njengesibambiso bemele bathole imvumo yokwenza lokho kubomkabo, kutsho u Chinake.

Wathi kungakho, bekhankasela indlela zokutholiswa kwabesifazane izikwelede eziqondene labo, ngendlela engenza baphatheke ngokugcweleyo enhlelweni zokuthuthukisa inotho yabo leyelizwe.

Kunje uChinake uveze ukuba abe NABW-Zimbabwe baphakathi kokukhulumisana labamabhanga kanye labamankampani azimeleyo, ukudinga indlela ezingaphathisa ukuqeda indubo osomabhizimusi besifazane ababhekane lazo kunhlangothi ezehlukeneyo zomnotho okubalisa ezokulima, ukwenjiwa kwamatshe aligugu, ezokwakha, ukusetshenziswa kwemitshina yakulezi nsuku kanye lakwezokulungiswa kwempahla.

Umqondisi wenkampani yomkhambo wegwayi eye Boka Tobacco Auction Floors, unkosazana Rudo Boka, uthi kusesele sidingo sokuba bathuthukiswe ngokwaneleyo abesifazane abaphatheke kwezokulima igwayi elizweni, njengoba bephathisa labo kuntuthuko yomnotho welizwe.

Wengeze ethi akumelanga bakhohlakale abesifazane kundaba zentuthuko yelizwe, kuyibona abalenani eliphezulu elizweni, kusitsho ukuba isilinganiso sokungamatshumi ayisitshiyagalombili ekhulwini salabo abahlala emaphandleni kuyibo abaphethe isibanga esimqoka sokuba ngomama.

Inhlanganiso ye NABW, esungulwe ngomnyaka ka 2011, ibunjwa zingatsha ezilitshumi zemazweni angempumalanga langezansi kwezwekazi leAfrica, njalo ijonge ukuthuthukisa abesifazane ezwekazi lonke labensundu.

XS
SM
MD
LG