amalinks wokungena

Breaking News

AbeUnited Refinaries Limited Bama Ukusebenza Bekhala Ngodubo Lwamanzi


Udubo lwamanzi

Inkampani yeUnited Refineries Limited isime ukusebenza ngenxa yodubo lokusilela kwamanzi olubhekane loBulawayo osekuphazamisa ukusebenza kwamanye amankampani ambalwa okulakho ukuphazamisa intuthuko yomnotho walelidolobho elivele selileminyaka libhekane lodubo lokuvalwa kwamankampani amanengi.

Lokhu kuvezwe embikweni owethulwe ngabenkampani le, wokwazisa uzulu labanye osomabhizimusi ukuba isime ukusebenzisa imitshina egaya amafutha lokupheka isepa ngoba ibhekane lodubo lokuswela amanzi osolwenze bengesenelisi ukuqhubeka besebenza.

UMqondisi weUnited Refinaries, uMnu Busisa Moyo uchasisa kabanzi ngalokho.

“Asisenelisi ukuthi isigayo sethu samafutha sisebenze ngakho iZNWA lohulumende sekumele bangenele basitholise amanzi. Umtshina wethu ogaya amafutha ufuna amanzi amanengi ngakhokhe asenelisi ukuthi sisebenze uma amanzi esilela kanje.”

UNkosikazi Nesisa Mpofu isikhulumi sekhansili yakoBulawayo uthi kulusizi ukuba kulamankampani athile asesehluleka ukusebenza ngenxa yokusilela kwamanzi.

“Kubuhlungu kakhulu kuKhansili ukuthi inkampani ize yafika esiskhathini sokuthi ivale ngoba amanzi ebengaphumi esikunanzleleyo yikuthi ipressure edonsa amanzi iphansi kakhulu amanzi malutshwana inkampani isebenzisa amanzi amanengi ukuthi ihlale ihlanzekile. Asivali amanzi edolobheni lasemaindustry uduboolukhona yipressure yamanzi akutsho ukuthi sibavalele amanzi. IZINWA isithembise ukuba izibholane sezizaqala ukutholisa uBulawayo amanzi okulakho ukwehlisa udubo lwamanzi.”

Uqhubekele phambili echaza ukuba amadamu edolobho asekumakhulu amabili lanye ekhulwini osekubangele ukuba impompi zingesenelisi ukudonsa amanzi afike endaweni eziqansileyo.

“Okwamanje sesilamanzi amalutshwane emadamu ethu silesilinganiso esifika amatshumi amabili lanye ekhulwini kuthi amadamu ethu amathathu avele asisakhi khona amanzi.”

Abenkampani yeUnited Refinaries abalungisa amamafutha okuphekisa, isepha lokunye, bathi bazaphindela emsebenzini nxa udubo lwamanzi lungaba nganeno bethi bakhangelele iZINWA loHulumende ukuba bangenele babancedise.

Ekwenqabeleni udubo lwamanzi uhulumende wakhupha inkulungwane ezithile zamadola ukuba kulungiswe izibholane eNyamaNdlovu ukuze uzulu lamafekithali bathole amanzi kodwa lezizibholane lokhe zingakaqali ukutholisa uzulu amanzi, ikhansili yaleli dolobho isithi kudingeka imali enengi ukwedlula leyo eyanikezwa nguhulumende.

Facebook Forum

XS
SM
MD
LG