amalinks wokungena

Breaking News

AbeZapu Bakhala Ngokudatshulelwa AmaPosters Okukhankasela Usekelo Kukhetho


Abamabandla bazonde bagane unwabu ngokudatshulelwa amaphepha abo okukankasela ukhetho becala ibandla elibusayo wokwephula ilunelo labo khona sekusele amaviki phose amathathu ukuba luqhutshwe ukhetho.

UMnunzana Phalamente Mlingo omele iZAPU kuWard 11 Emakhandeni ucala iZanu PF ngokunamathisela amaposter abo phezu kwawakhe.

"Ubunzima esengihlangane labo yikuthi ibandla elibusayo lihamba livala awami linamathisela amaposter abo pheze kwawami njalo kuyakhanya abakwenzileyo".

UMlingo uthi usekhweze udaba lwakhe kwabeZEC lasemapholiseni eNtumbane Police Station.

"Sengenelise ukuyamangala eZEC, lasemapholiseni kodwa lokhe kuthule, njalo kuyakhanya ukuthi banamathisele amaposter abo phezu kwawami njalo silobufakazi.

UMsekeli kaMongameli weMRP, uNkosazana Presia Ngulube uthi bebe sebenamathisele amaphepha abo uBulawayo wonke okukhankasela ukuvotelwa kukhetho kodwa wonke asekhitshiwe.

"Amaposter sesifakile indawo zonke koBulawayo, kodwa eCowdrayPark leNkulumane yikho lapho akhutshwa khona kakhulu lobanje singakayibikela iZEC, kodwa ilunga lethu leNkulumane uXaba usethe wayamangala".

Isikhulumi samapholisa aweZimbabwe Republic Police, uInspector Precious Simango uthe ebuzwa ngamacala asethe alethwa enkambeni ezithile ephiwa lenombolo zamacala uthi awekho ewofisini yakhe kodwa usethumele abanye bakhe ukuba baphenye lezindaba uzathi esekhuluma. Umsakazo uze waya emoyeni elokhe engakaphenduli.

Amabandla aphikisayo acala ibandla elibusayo ngokuphazamisa amaphepha abo omkhankaso bethi kuyisenzo esibi njalo kuveza ukuba ukhetho oluzayo alukhululekanga.

Abebandla leZanu PF bona bayakulandula lokhu besithi oyabe ebanjwe esenza lokhu akabotshiswe.

Facebook Forum

XS
SM
MD
LG