amalinks wokungena

Breaking News

AbeZimbabwe Abahlala Kwamanye Amazwe Abakalaleli Inkuthazo kaMnangagwa Eyokuthi Babuyele Ekhaya


Umngcele we Zimbabe le South Africa

Sokwedlule inyanga ezine uMongameli Emmerson Mnangagwa enxuse abeZimbabwe abasemazweni ukuthi beze bezomncedisa ukuthuthukisa ilizwe, kodwa lalamhlanje lokhe kungabonakali amaxuku abantu abasabela lolubizo.

Inengi lamemeza lisithi ilizwe selikhululekile labo sebezabuyela ekhaya.

Linjabulo yaphinda yezwakala futhi ngesikhathi kungena umongameli Emmerson Mnangagwa esikhundleni, ikakhulu kuthatshelwa unxuso lwakhe lokuthi abasemazsweni abaphenduke ekhaya.

Kodwake ngemva kwenyanga ezimbalwa lolunxuso lwenziwe akukabonakali indwendwe zabantu bethwele imikungulu emakhanda besithi sebephindela emuva.

Lobanje umongameli Mnangagwa waqala uhambo lwakhe kwamanye amazwe ngokungena eSouth Africa ezonxusa osomabhizimusi beZimbabwe ukuthi beze ekhaya, inhlanganiso ekhankasela ukusungulwa kwamabhizimusi eZimbabwe eye Zimbusiness Link SA, ithi osekusenzakala ngemva kwalolunxuso kuyadanisa.

Umnumnzana Marshall General Sankara nguye umgcinisihlalo wale inhlanganiso kukanti laye ngusomabhizimusi omkhulu kwezemfundo, ezokukhangisa kanye lezokuqeqetsha abafuna ukungena kwezamabhizimusi.

Uthi akulangitsho lolulodwa uhlelo oselulungiswe nguhulumende ukuxhaza izizalwane zeZimbabwe ezifuna ukubuyela ekhaya ziyesungula inhlelo zamabhizimusi.

“Le ingoma ayiculayo ahamba ecula ethi iZimbabwe ivulekile for osomabhizimusi, akatsho thina utsho osomabhizimusi abelungu, abangaphandle. Kanti thina sithi ukuze ilizwe likwazi ukuphumelela kumele likwazi ukuthi linxuse abantu balo,” kutsho uSankara.

Le yinto egcizelelwa ngumnumnzana Austin Moyo. UMoyo usungule iphephandaba elihlonitshwa kakhulu esabelweni seMpumalanga iKhanyisa Weekly Newspaper kantike useze wavula lebhizimusi lezokudla elibizwa Kwashashe restaurant.

UMoyo uthi akekho usomabhizimusi ololwazi ngezomnotho ongafulathela iSouth Africa esiyasungula ibhizimusi eZimbabwe okwakhathesi. Uthi ingozi yikuthi ufika ibhizimusi lakho liwe ugcine usudinga umsebenzi lawo ovele ungekho.

Uthi futhi kusegcekeni ukuthi kazikho inhlelo zokusiza labo abangelamabhizimusi okuzathi bangafika ekhaya bazithole sebeluhlupho.

Kutsho uMoyo: “Kufuna ma uvela eDiaspora ufika eZimbabwe ube ngumuntu ozoba ngumqatshi. Uqatshe abantu obathole eZimbabwe nabanye obuye labo eDiaspora. So yikhonje saqala lenhlanganos esiyibiza ngokuthi yiDiaspora Care Forum, ukuthi abantu bakwazi ukuforma amacooperatives bazokwazi ukuthola ifunding.”

Inengi labosomabhizimusi lithi belibekhangelele ukuthi ngemva kwenyanga ezine, imali ibisitholakala emabhanga, iBond libe selisusiwe, uhulumende eseqalile ukujezisa bonke abaguqisa ilizwe ngamadolo ngobusela, kodwa konke lokhu bathi akulangitsho lesibonelo sokuthi kuzakwenzakala.

Uzulu makhaza laye uthi ayikho into ekhuthazayo ukuthi babuyele ekhaya. Abanengi sekuleminyaka behlala kwele South Africa bazala abantwana labo asebelabantwana bengakaze balugxobe eZimbabwe. Labake bathi ukubuyela ekhaya kuyabe kuyisihluku ebantwaneni okuzafuze bayeqala impilo enzima kakhulu eZimbabwe.

Unkosazana Ntando Moyo ngomunye wabo kanti yena uselabantwana abathathu ababili babo owabathola evele esesegoli.

“Akukho lula ukuthi abantwana siphombukupakitsha ama bag sithi siyahamba ekhaya. Ngoba abantwana basezikolweni bayafunda lapha. Ekhaya indawo yakhona ifika idingwe and ngapha se besettled. Ekhaya asazi ukuthi uyafikela ngaphi uqale ngaphi and I curriculum yakhona itshiyene lalapha so yinto okufanele abantu bazilungiselele yona hayikhona ukupakitsha izikhwama kuthiwa sesibuyela ekhaya,” kutsho uMoyo.

Banengike abathi ngokufika kweleSouth Africa bafika bathola imisebenzi emihle kanti sebehlonitshwa kakhulu kuleli.

Laba bagoqela umnumnzana Ben Magara, okhokhela inkampani enkulu yezokwemba iPlatinum eyeLonmin, umnumnzana Strike Masiyiwa owenkampani ye Econet esisemazweni ambalwa, umnumnzana Tawana Kupe osengomunye wenkonkeli ezaziwa ilizwe lonke eUniversity ye Witwatersrand labanye abanengi.

Umgcisisihlalo weZimbabwe Community in South Africa umnumnzana Ngqabutho Mabhena uthi iqiniso yikuthi okwamanje ngaphandle kokukhuluma ngomlomo asikabikhona isibonelo sokuthi uhulumende kamnumnzana Mnangagwa uzayiguqula iZimbabwe ibuyele kulokhu ebiyikho khona kwezomnotho, kwezemfundo, kwezokulima, kwezemisebenzi kanye lokusebenza kwezamabhizimusi ngendlea eqondileyo.

“Abantu bakhangelele ukuthi ukhetho oluzakubakhona ngoJuly kumbe ngo August kube lukhetho olukhululekileyo, oluzakwenza ukuthi amazwe angaphandle lawo abuye azofaka imali phakathi kuvuleke imisebenzi. Okwakhathesi amathuba omsebenzi awekho. Nxa amathuba omsebenzi angavuleka bona bazimisele ukuthi babuyele,” kutsho uMabhena.

Banengike abathi ekhaya basuswa ngezomnotho ezilele ngogedla lezombusazwe ezingemukeli ukwehluka kwemibono ngakhoke lezi izinto ma zingalungiswa, kusasekude ukuphindela kwabo ekhaya.

please wait

No media source currently available

0:00 0:05:22 0:00

Facebook Forum

XS
SM
MD
LG