amalinks wokungena

Breaking News

AbeZimbabwe Abasemazweni Basola Isinqumo Sokuqala Bagcinwe kuQuarantine Nxa Babuyela Ekhaya


Umpathintambo wezokwethulwa kwemibiko, uNkosikazi Monica Mutsvangwa

Izizalwane zeZimbabwe kweleSouth Africa zithi zikhathazekile kakhulu ngesaziso sikahulumende welizwe lazo, sokuthi nxa bebuyela ekhaya bazaqala bagcinwe endaweni ethile okwamalanga, kuQuarantine, behlolwa ukuba abalayo yini icoronavirus njalo behlawulela indleko yokugcinwa lapho kumbe bayezihlawulela ukuhlala ehoteleni.

Inengi labeZimbabwe laba bathi inyathelo likahulumende leli lizaba vimba ukuya ekhaya okuyinto ezakwenza behlale isikhathi eside bengabonani lemuli zabo ezisekhaya.

Isizalwane seZimbabwe obuye njalo abe yisikhulumeli senhlanganiso alwela amalungelo abesifazana eyeZim Imbokodo uNkosikazi Corrence Mukosi-Ncube uthi akuzwisiseki ukuthi uhulumende uselusoleni uhlelo lokuthi umuntu angene ngencwadi ekhombisa ukuthi uhloliwe kwatholakala ukuthi akalalo igciwane.

“Akuwona umbono noma isinqumo esihle emphakathini ngoba lokho ngicabanga ukuthi kuzaphoqa abantu ukuthi beqe umngcele bengangeni ngokusemthethweni. Phela ngizathi ma ngicabanga insuku engiziphiwe ukuthi ngiyekhangela lami ekhaya ngikhangele abadala zizabe zizincane besekuthiwa angiqale ngivaleleke. Uthole ukuythi mhlawumbe uhambela umkhuhlane.”

Ekhuluma labezindaba ngoLwesibili, ngemva komhlangano wedale labaphathintambo, umphathintambo wogatsha olubona ngezokwethulwa kwemibiko uNkosikazi Monica Mutsvangwa uthe izizalwane zeZimbabwe ezibuyela ekhaya zizaqala zigcinwe kuma Quarantine Centers, zingakavunyelwa ukuyahlangana lemuli zazo.

Labo abagciniweyo kusamelelwe ukubona ukuthi abalawo yini umkhuhlane wecorona bazazibhadalela indleko zonke zokugcinwa kwabo.

Abathokalala belomkhuhlane weCovid-19 labo kukhangelelwe ukuthi bazibhadalele imali yokwelatshwa lezinye indingeko ezibhedlela abayabe bevalelwe kuzo.

Esinye isizalwane seZimbabwe umnumnzana Mlungisi Tshabalala uthi lesi yisinqumo esenziwe nguhulumende engazange acabangisise kahle.

“Abantu bahamba ekhaya for isikhathi esifitshane kakhulu 3, 4 days or one week. Manje ma kuthiwa sebezagcinwa kunzima kakhulu. Besicela kugovernment weZimbabwe ukuthi as long umuntu elazo incwadi ezimvumelayo ukuthi uCovid free akangene elizweni. Siyacela kugovernment ukuthi abantu baphila ngokungena emazweni bedinga into ezingabaphilisa, abacatshangelwe.”

Lobanje imingcele yeZimbabwe ibisavaliwe, labo abalencwadi ezisemthethweni zokusebenza kweleSouth Africa bebelokhu bevunyelwa ukungena lokuphuma elizweni. Bekudingeka kuphela ukuthi babe lencwadi ezikhombisa ukuthi abalalo igciwane lecoronavirus. Besekulensolo ezinengi ngalezi incwadi njengoba abanye bekubikwa besebenzisa ezamanga okuyinto ebifaka izihlobo zabo engozini.

Kodwake abanengi bathi bekungcono kusetshenziswa lezi incwadi njengoba ukuvalelwa sekusitsho ukuthi sebengaqeda phezu kweviki bengakafiki emulini zabo kantike bazabe sebefuneka lasemisebenzini kweleSouth Africa.

Isikhulumeli sebandla le The Patriotic Front umnumnzana Mxolisi Ncube uthi iphutha elikhulu kulesisinqumo ngelokuthi uhulumende athi laba bantu bazibhadalele indleko zokugcinwa kwabo.

“Angiboni kuyisu elihle ukuthi abantu labo abasuka phandle kwelizwe nxa befika elizweni kuthiwe bavalelwa ngezimali zabo ngoba siyazi ukuthi inengi labeZimbabwe abaphandle kwelizwe awalayo yona imali yokuthi bazithengele okuya ethunjini. Kukanti nxa sesibengezelela futhi umthwalo ongaka uhulumende ngibona engani uzathi esithi uzama ukuvikela ukumemetheka komkhuhlane agcine esewumemethekisa ngoba abantu bazabe bengasangeni ngendlela eziyizo elizweni.”

Abanye bakhala ngokuthi ngesikhathi uhulumende esanda kwethula uhlelo olufanayo icorona isanda kufika nyakenye, bekulokukhonona okukhulu ngokungcola, indlala lesiphatho esingesihle kunengi zalezi indawo. Bebekhona njalo abebekhala ngokuthi bafike bathola icorona kulezi indawo ngenxa yokuminyana kwabantu.

Unkosikazi Mutsvangwa uthi uhulumende usahlolisisa ukuthi isigulane esibulewe yicoronavirus edolobheni leKwekwe kungabe besihlaselwe luhlobo lwecoronavirus esibulele abanengi kwele India na?

Uhulumende weSouth Africa usanda kubika ukuthi izabelo ezimbili iGauteng elabeZimbabwe abanengi leFree State sezingene kuhlandla lesithathu lokuhlaselwa yicoronavirus. Lokhu kulandela njalo imbiko ekhombisa ukuthi uhlobo lwecoronavirus oseluqede abantu kweleIndia lolumemetheka ngesiqubu eNgilandi omabili amagciwane la asengenile kweleSouth Africa.

Sebesedlula isigidi lezinkulungwane ezingamakhulu ayisithupha (over 1,6 million) abantu asebehlaselwe yicoronavirus kweleSouth Africa kantike baphezu kwezinkulungwane ezingamatshumi amathathu lesitshiyagalombili (over 38,000) asebehlaselwe eZimbabwe.

Udaba lwabeZimbabwe abaseSouth Africa besola isiqondiso sikahulumende ngeCovid 19, siluphiwa nguThuso Khumalo
please wait

No media source currently available

0:00 0:05:05 0:00

Facebook Forum

XS
SM
MD
LG