amalinks wokungena

Breaking News

AbeZimbabwe Badaniswa Liqula Elithunyelwe nguMongameli Cyril Ramaphosa


UMongameli Cyril Ramaphosa wakweleSouth Africa

Ingcitshi ezicubungula ezombusazwe labamabandla aphikisayo eZimbabwe bale mizwa ehlukeneyo ngendlela iqula elithunywe nguMongameli Cyril Ramaphosa wakwele South Africa, ukuzodinga ulwazi lokuxhazulula indubo ezibhekane lelizwe.

Leliqula liye eZimbabwe lakhulumisana loMongameli Emmerson Mnangagwa kuphela lingazange laba lethuba lokukhulumisana lamanye amabandla ezombusazwe loba inhlanganiso ezilwela amalungelo oluntu.

URamaphosa uthumele iqula elibunjwa ngabathathu abathi uNkosikazi Baleka Mbete, uMnu Sydney Mufamadi le qwetha uMnu Ngoako Abel Ramathlodi bona abahlangane lo Mongameli Emmerson Mnangagwa esigodlweni sakhe eseState House izolo.

Abathathu laba babuye ukuzekuzwa okungabe kubangela indubo ezibhekane lele Zimbabwe ngemva kwemibiko eyethulwe nguRamaphosa ngeviki edluleyo yokuthi ukhathazekile ngomumo okomakhelwane wakhe. Kodwa abamandla aphikisayo badane kakhulu ngokuba iqula leli kalizange lizinike ithuba lokuzwa elabo icele.

Umsekeli wesikhulumeli se MDC Alliance uMnu Felix Mafa uthe batshone belindile ilanga lonke layizolo bamangala sebetshelwa ukuba iqula leli kalisenelisi ukukhuluma labo.

“Abadala bathi ithemba kalubulali. Sitshone kusukela ngo 10 am kwaze kwafika u 4pm ntambama ngoba babesinxusile ukuthi bezwe ukuthi kanti izinto ezihluphayo kuyini. Ngokuswelekala kwenhlanhla siyamangala ukuba sebebuyelile ngenxayani. Ngokufunda kwethu sibona ukuba uPresident Mnangagwa engabe eyalile ukuthi bakhulume lathi”

UMafa uqhubeke esithi bebezimisele ukutshela ele South Africa ukuba libone indlela elingasiza ngayo ele Zimbabwe lona elithwele nzima ngokubotshwa lokuhlukunyuzwa kwabasekeli bebandla eliphikisayo lalabo abasola uhulumende. Uthe kabasoze belahle imbeleko ngokufelwa esithi bazaqhubeka bekhuluma ukuba amazwe aku SADC angenele kundubo ezibhekane lele Zimbabwe.

Unobhala webandla le MDC-T uMnu Nixon Nyikadzino uthi njengebandla kuyabathokozisa ukuba ele South Africa selizimisele njalo ukulungisisa indubo ezibhekane leZimbabwe.

“Into esiyibonayo yikuthi njengelizwe elithanda iZimbabwe kuthunyelwe laba bantu ukuthi bakhulume lo Mongameli Mnangagwa bengabe sebebone ukuthi njengelizwe sesehlulekile, uMnangagwa seyehlulekile ukulungisa ilizwe”

Kodwa omele inhlanganiso yabeZimbabwe abahlala kwele South Africa, eyeZimbabwe Community in South Africa uMnu Ngqabutho Mabhena uthi kabazi lutho ngokukhulunywe phakathi kwequla leli lo Mongameli Mnangagwa esithi lokhu kumele kube segcekeni.

“Besingela lwazi ukuba inkulumo okumele bayethula ku Mnangagwa asazi ukuba ithini. Akekho oke waxhumana lathu ukuthi bakhulume lathi. Thina njenge Zimbabwe Communist Party esikukhangelele kakhulu yikuthi iANC lamanye amabandla alwa impi akhulume le ZANU PF”

Ingcitshi kwezombusazwe uMnu Pride Mkono uthe nxa eleSouth Africa lingakaqali ukukhuluma labenhlangothi zonke zempilo eZimbabwe, kalikazimiseli ukulungisisa indubo zalelo lizwe.

“Ukwehluleka kwabammeli baka President Ramaphosa ukuthi behlangane lenhlanganiso ezizimeleyo kutshengisa ukuba u President Ramaphosa kakazimiseli ukulungisa indubo ze Zimbabwe yikho sibona abantu bebalekela kwele South Africa”

Ekhuluma lentathelizindaba e Harare izolo omunye wequla leli uMnu Mufumadi uthi kabasoze batsho abakukhulume loMnangagwa kabezindaba ngoba bezamele baqale bazise uMongameli Ramaphosa obathumeleyo.

Ukuza kwequla leli eZimbabwe besekuletha ithemba lokuthi amazwe angomakhelwane asethatha amanyathelo ngesimo esiselizweni, nanku abenhlanganiso ezehlukeneyo zomhlaba lamanye amazwe besethula imibiko yokukhathazeka ngalesi simo, okugoqela umgcinisihlalo wekhomishini eye African Union uMnu Mousa Faki Mahamat laye owethule owakhe umbiko ekhuthaza uMnangagwa ukuba ahloniphe amalungelo oluntu.

Udaba lwequla likaMongameli Ramaphosa kweleZimbabwe siluphiwa nguMlondolozi Ndlovu
please wait

No media source currently available

0:00 0:05:40 0:00

Facebook Forum

XS
SM
MD
LG