amalinks wokungena

Breaking News

AbeZimbabwe Bathi Abayi Ekhaya ngeKhisimusi Ngenxa yeCoronavirus


Beitbridge border, Zimbabwe

Akusensukuzatshwala ingafikanga iKhisimusi kodwa izizalwane zeZimbabwe kweleSouth Africa zithi zilokhu zisidla amathambo enqondo ngokuthi zihambe kumbe zingayi ekhaya njengoba iCoronavirus isivuke eseganga kweleSouth Africa.

Ngalesi sikhathi somnyaka kuvame ukuphithizela emarenkini lendaweni zabomalayitsha eJohannesburg izizalwane zeZimbabwe zilubhekise ekhaya ukuyakudla amakhumukhumu lezihlobo labangage.

Kodwa lonyaka igciwane leCoronavirus likuguqulile konke lokho. Isizalwane seZimbabwe uNkosazana Delisani Maqhoba uthi bayesaba ukuthatha uhambo lokuya ekhaya ngesikhathi icoronavirus isidla amahabulo kweleSouth Africa.

“Esibona kuqakathekile yikuthi sithumele abantwana labo bethole okokudlulisa ikhisimusi kuphela kodwa ukuthi thina siyahamba hayi. Nxa kufanele uhambe kufanele uyeyenza itest. Ukutester khonokhuyana kuyadula. Imali yakhona asilayo vele. Lemali ukuhamba endleleni kuyadula. Kubuhlungu kodwa lokho sabafundisa ukuthi bekwamukele ngoba sekungenzeka ngihambe ngifike ngibathelele icorona kumbe ngifike ngithathe icorona, kuyikufa.”

Ngakolunye uhlangothi unkosazana Charity Nkomazana uthi iCovid-19 ibathathele imisebenzi yatshiya izamba zitshayumoya.

“Intokozo kayikho ngoba kumanje lezibalo ziqhubeka zisiyaphambili asazi. Lasemakhaya sebangakhona abangahamba njengoba lathi besifisa ukuthi sihambe but ngesimo sonesi esibhekane naso yonke into sehlulekile. Asikhonanga ukwenza lutho.”

Abanye bathi inyathelo likahulumende weZimbabwe lokungavumeli ukuthi amabhasi lemitshova kuqale ukuthwala abantu kwenza kube nzima ukuthi baye ekhaya ngekhisimusi. Ngokwesinqumo sikahulumende weZimbabwe imota ezincane, abahamba ngenyawo labagade indizamtshina yibo kuphela abavunyelwayo ukungena lokuphuma elizweni.

Unkosazana Nobuhle Aditi uthi uyesabela ukuthi imuli ezinenhgi ezithembele kulabo abaseSouth Africa lonyaka zizatshona ngengqweqwe zomlono ngekhizimusi.

“Financial wise it’s really been hectic because thina abanye asilasource of income. That’s why lamanje I don’t think I will even be going home. I don’t think I will afford ukuhamba ekhaya njengabanye coz imali ayikho lonyaka.”

Esinye isizalwane seZimbabwe umnumnzana Greatman Mkhwebu uthi labo abaya ekhaya sebengazithola sebevalelwe eZimbabwe bacine belahlekelwa yimisebenzi.

“Ya sizabolela khonapha mhlawumbe until emnyakeni ozayo. Kungenzeka uthi usekhaya uMnangagwa laye abeke enye imbandela yelockdown ucine ustakile ekhaya uphelelwe ngumsebenzi ngapha ekhaya awusebenzi. Umuntu lo muntu akahlale lapho akhona angazihluphi ngokuya ekhaya, simple.”

Abanyeke, ikakhulu abangasebenziyo lalabo abahlala lemuli zabo kweleSouth Africa bakhala ngenhlawulo ezidingekayo ukuze umuntu ehambe eZimbabwe aphinde aphenduke, Ngaphandle kwemali yokugada, ohambayo kuzafuze abhadale amarandi angamakhulu ayisitshiyagalombili (R800) ukuze ahlolwe athole incwadi ethi akalalo igciwane lecoronavirus. Nxa esebuya kuzafuze enze into efanayo eZimbabwe ukuze avunyelwe ukungena kweleSouth Africa.

please wait

No media source currently available

0:00 0:03:13 0:00

Facebook Forum

XS
SM
MD
LG