amalinks wokungena

Breaking News

Abakhokhela Amabandla Ezokholo LwesiKhristu Basola Udlakela eSouth Africa Oluqondiswe Kwabokuza


Zimbabwe Heads of Church Denominations

Abomanyano wenkokheli yamabandla okholo lwesiKhristu owe Zimbabwe Heads of Church Denominations – ZHOCD basole kakhulu udlakela oseluqhamuke kwele South Africa luqondiswe kuzizalwane zakwamanye amazwe zezwekazi le Africa ezikulelo lizwe, besithi kumele kudingwe indlela zokulumisa kokuphela.

Insolo yabeZHOCD iza ngemva kweyethulwe ngabenhlanganiso yabokholo lwesiKhristu ezwekazi le Africa eye Fellowship of Christian Councils in Southern Africa – FOCCISA.

Embikweni wabo abawethule ngemva kokuqhamuka kodlakela kwele South Africa lapho abakwamanye amazwe awezwekazi le Africa beqhubeka behlukunyezwa lokubulawa, abe ZHOCD bathi kumqoka ukuba zihlolisiswe inkinga kwezombusazwe lomnotho ezibhekane lamazwe angezansi yezwekazi le Africa.

Bakhuthaza njalo iziphathamandla zomanyano owe Southern African Development Community - SADC ukuba ziveze iqiniso ngokwenzakalayo emazweni azo okuyikho okubangela izizalwane zawo zibone kungcono ukulubhekisa kwele South Africa ukuyadinga okungaziphilisa.

Unobhala wenhlanganiso yeZimbabwe Council of Churches, u Reverend Kenneth Mtata ulandisa kabanzi ngokubafuqileyo ukwethula lumbiko.

“ Amabandla lawa ayazwisisa kakhulu ukuthi abantu abahluphekayo e South Africa babona angathi abantu abaphuma phandle yibo abathatha izikhundla lamathuba lawo amele abe ngawabo.

Amabandla athi umsebenzi omkhulu owe SADC LE AU lamazwe lawo aku SADC yikuthi kungenziwa njani ukuze kutholakale indlela yokulungisa indaba yonke eyokuhlukumeza abantu abaphuma phandle ngoba awusoze ube ngumsebenzi wabe South Africa kuphela ”.

U Mtata uthi enye inhloso ngeyokukhumbuza abamabandla esiKhristu ngokutshiyo ngumbhalo.

“Ngalokho bacindezela kakhulu ukuthi amabandla lawo ahambise phambili isicelo lesi kuma ukuvikeleka kwabantu labo abaphuma phandle kudingwa indlela yokuthi kungenziwa njani ukuze amazwe lawo lapho abantu bephuma khona, angenza njani ukuze abantu bathole inhlalakahle eyenza ukuthi bengabaleki besiya e South Africa, bahlale emazweni abo ngokuthula, ngokujabula.”

Umfundisi Simbarashe Maringosi waseHarare laye uvumelana lombiko wabe ZHOCD phezu kwesimo esise South Africa.

“Singafunda i Bhayibhili ku Leviticus 19 Verse 33, I Bhayibhili lithi lona, futhi nxa owezizweni ehlala njengowezizwe lawe elizweni lakini, lingamncindezeli.
Lokho kusitsho ukuba lingamphathi kubi, lingambulali, lingamtshayi, lingamncindezeli, limthathe njengomunye wenu. Kodwa sibona abantu abe South Africa bebulala obhudi babo abavela kwamanye amazwe awe Africa, yinto embi leyi kanjalo kumele icine. Abakhokheli bamazwe kumele behlangane, behlale ndawonye, belungise indaba leyi ”

Inkokheli yamazwe awezwekazi leAfrica, uMaringosi uthi kumele ilungisise imbangela eyenza abantu babalekele kwamanye amazwe ukuyadinga okungabasiza.

“Ama economy awamazwe awe Africa kamanga kuhle, abantu babalekela ama economy abo besiya kwele South Africa ngoba i economy ye South Africa iqinile. Bayabe bedinga imisebenzi, bayabe bedinga impilakahle. Lokhu akukho emazweni abo. Abanye babalekela ukuthi bayabe sebengene endabeni zombangazwe, bayabe befuna ukubulawa ngabakhokheli kumbe abantu ababusayo emazweni abo.Yiyo imbangela eyenza ukuthi abantu babaleke besuka emazweni abo besiya kwele South Africa. Kodwa kungalungiswa lokho, ama economy wona lawa awamazwe e Africa, kasisoke sibe layo lindaba eye xenophobia eyokuthi abanye bayabe sebesithi ama foreigners yiwo asithathela imisebenzi. Akusoze kube Labantu abanengi abasuka emazweni abo besiya kwele South Africa ”.

Esinye sezakhamizi zeHarare uMnu. Collins Ncube uthi kumele abeSouth Africa bazi ukuba abokuza bemazweni aweAfrica ayisibo ababangela inhlupho ababhekane lazo.

“Ama Nationals anje ngabo Nigeria kule MTN, i MTN yiyo esetshenziswa kakhulu, ove 57 million people in Nigeria abasebenzisa i MTN. Amahofisi abo avaliwe, why, because njenge Africa silobudlelwano, silokusebenzisana, we benefit from each other kodwa nxa sekutshayanwa kuthiwa ama foreigners kahambe, yiwo ayenze lokhu lalokhuyana, angikholwa ukuthi it’s a fair move. Lakhona akusincedisi ukuthi sihlalisane kuhle njengabantu base Africa. And singakhangela, i economy yase South Africa ibanjwe ngama Europeans so akulani labantu abe Africa abazama labo ukuziphilisa nje ngabanye abantu elizweni.”

Abakumanyano ZHOCD abethule lumbiko phezu kokwenzakala kwele South Africa ngabasuke ehlanganisweni ezibalisa eye Zimbabwe Council of Churches – ZCC, Zimbabwe Catholics Bishop’s Conference – ZCBC, Evengelical Fellowship of Zimbabwe – EFZ leye Union for the Development of Apostolic Churches in Zimbabwe – UDACIZA.

please wait

No media source currently available

0:00 0:03:44 0:00

Facebook Forum

XS
SM
MD
LG