amalinks wokungena

Breaking News

Amabandla Ezombusazwe Athi Azavotelwa Nguzulu Kukhetho Oluzayo


Kulabanye abantu abathi ibandla elibusayo kalenzi kahle eZimbabwe kubelabanye njalo abathi akuqedakali okwenziwa ngamabandla aphikisayo ngesikhathi kulungiselelwa ukhetho oluzakwenziwa ngomnyaka ka2023.

Amabandla wonke athi loba abantu bebhekane lenhlupho ezinengi, azimisele ukubusa ilizwe leZimbabwe ukwenzela ukuguqula okuhlupha uzulu.

Okwamanje abantu bakhala ngokugugudeka komnotho, ukungaguqulwa kwemithetho etshiyeneyo engenza kube lombuso obalulekileyo elizweni, ukudlephana kumabadla aphikisayo lokunye.

Ibandla leZanu PF lithi kunengi eselikwenzele uzulu eZimbabwe loba kulabanye abakhonona ngokuthi sebephila njengenyamazana ngenxa yokuswela imisebenzi ngesikhathi ilizwe lilwisana lomkhuhlane weCOVID-19.

Umphathintambo obona ngezokusetshenziswa kwemali yelizwe, uMnu. Mthuli Ncube, usanda kwethula umbiko oveza ukuba ilizwe lenze imali ebelenzalo efika phose amabhiliyoni alitshumi amadolar – 9.8 billion Zimbabwe dollars enyangeni ezintathu ezisanda kwedlula.

Kodwa abantu bahlaba umkhosi besithi imali kayibambeki eZimbabwe lapho abaphila khona ngamandla kaNkulunkulu.

Kodwa uMnu. Mabutho Moyo, umsekeli walowo obona ngezemisebenzi kubandla elibusayo, uthi badlelana kahle lozulu ozabavotela kukhetho oluzayo.

“Kusobala ukuthi kwezombangazwe iZanu PF izanqoba ngo2023, lokhu kudalwa yilokho esithi yakwenza okujabulisa uzulu. Siyibalile ireport ebhalwe yiWorld Bank eyokuba umnotho wethu uzakhula kungelani lokuthi sibhekane lomkhuhlane weCOVID-19.”

Amabandla aphikisayo akhala ngokuthi uhulumende uyehluleka ukulungisa ezomnotho loba esethulela uzulu imibiko ethi usanda kwenza imali enengi okumangalisayo.

Athi yiwo alwela amalungelo kazulu hatshi uhulumende obopha mahlayana abantu abavalelwa entilongweni bengelamacala.

Okwamanje athi azama ukukhanga abantu ukuba babhalisele ukuvota kukhetho oluzakwenziwa ngomnyaka ka2023. Isikhulumeli sikamongameli webandla leMDC Alliance, uDokotela Nkululeko Sibanda, uthi kunengi asebekwenzele abantu ngakho-ke bazanqoba kukhetho lokudinga amakhansila, abazamela idale lephalamende lamakhansila.

“UMongameli Chamisa nguye owanqobayo kukhetho luka 2018. Kumngceke ukuthi umongameli Chamisa uzaphumelela ngo2023. IZanu iyakwazi lokhu yikho izama ukuqila kodwa ukuqila lokhu akusoze kusebenze.”

Akwaziwa ukuba ibandla leMDC Alliance, elikhokhelwa nguMnu. Nelson Chamisa, lizakwenelisa ukubamba ngamandla uhulumende ukuba aguqule indlela okuqhutshwa ngayo ukhetho ngenxa yokuthi lilamalunga amalutshwana kudale lephalamende.

Kulabanye abantu ababambe owangaphansi bemangaliswa yikuxokozela phakathi kwebandla leMDC Alliance lele MDC-T, elikhokhelwa nguMnu. Douglas Mwonzora.

Bathi amabandla la kawaselandaba labo. Kodwa uMnu. Witness Dube, ophethe uhlangothi lokwethulwa kwemibiko kubandla leli, uthi basebenzelana lozulu. Uthi okwamanje sebelungiselela ukhetho oluzayo.

“Izinto azimanga kuhle kwele Zimbabwe sikhangele umkhonomi lakho. Okukhona yikuthi thina njenge MDC-T siyazilungiselela kabanzi sikhangelele ukhetho luka 2023. Abantu beZimbabwe bake banqoba ukhetho ngo2008 phansi kwesimo esifana lalesi.”

Ibandla leZapu lithi lidlelana kahle lozulu ngoba yiyo insika yalo. Lithi lilwisana lombuso kaMongameli Emmerson Mnangagwa ngazo zonke indlela, lincedisana labantu bakwele Zimbabwe.

Ibandla leli lithi ukudlelana kwalo labantu kuveza ukuba lilibandla likazulu. Umkhokheli walo, uMnu. Isaac Mabuka, uthi lokhu yikho okuzakwenza banqobe kukhetho oluzakwenziwa ngomnyaka ka2023.

"Izinto ezibonakalayo yikuthi elizweni wonke umuntu usedubeka kakhulu. Abantu bebetshiye iZAPU kukhetho olwedluleyo, amadolobho kasela tara, indawo zonke abantu bayadubeka akusela magetsi. Abantu bayakwazi ukuba iZAPU yiyo eyabalwelayo."

Ngokuhlupheka kwabantu elizweni, kukhanya engani uzulu uphakathi kwelitshe lembokodo. Kulabanye abathi sebelahlwe nguhulumende kanye lamabandla aphikisayo. Ingcwethi kwezombusazwe ezimeleyo, uMnu. Bekezela Gumbo, uthi ukuxokozela phakathi kwamabandla aphikisayo lokuzehlulekela kwebandla elibusayo kuzavela kukhetho oluzakwenziwa ngomnyaka ka2023 njengoba lenkokheli yomdabu layo izangenela kwezokuvota.

“Khonokhu okukuthi abantu baphume ezindlini beyebhalisa ukuvota, kumele kubonakala ukuthi kube lenguquko kwezokhetho. Kumele inkokheli yomdabu itsho ukuba kabala nhlanganiso abayisekelayo, lokuthi ababebutho betsho ukuba abalaqembu abalisekelayo.”

Eyinye njalo ingcwethi kwezombusazwe ezimeleyo, uMnu. Blessing Chidonhi, uthi ukumemetheka komkhuhlane weCOVID-19 ngokunye okwenza kukhanye engani abantu balahlwe ngamabandla wonke ezombusazwe. Uthi uhulumende kavumeli ukuba amabandla aphikisayo angene kuzulu.

“Amabandla aphikisayo kuleli kawalungiselelanga ukhetho. Kabalandawo zokukhankasa ngenxa yomkuhlane weCOVID-19 okwenza ukuba bengatholi ithuba lokuya khankasa. Singakhangela emadale kabala bizo elingelabo.”

Banengi abantu abakhala ngokwenzakala kumandla ezombusazwe njalo abathi kabasoze bevote kukhetho oluzayo ngoba uhulumende kabenzeli kahle kuthi njalo abaphikisayo badlephana sonke isikhathi.

Facebook Forum

XS
SM
MD
LG