Amapholisa lamasotsha athi asebumbe iqula elizahluza udaba lokutshaywa kwamapholisa ngamasotsha eHarare ngoLwesibili.
Iziphathamandla zengatsha zombili zitshele intathelizindaba ngoLwesihlanu ukuthi zikhathazekile ngesehlakalo lesi njalo zithembise ukujezisa bonke abaphatheka kudlakela lolu.
“Silusizi kakhulu njengabezomvikela ngesehlakalo esenzakala mhlaka1 ngoNtulikazi edolobheni leHarare,” kutsho ingatsha lezi embikweni eziwulobe zibambene.
“Siyakusola kakhulu okwenzakalayo njalo sithanda ukwazisa uzulu ukuthi sesibumbe iqula elizacwayisisa ngesehlakalo lesi.”
Ingxabano le iqale ngemva kokuba amapholisa epontshise imota yelinye isotsha ngama-spikes.
Lokhu kucunule amasotsha aseqoqana angena edolobheni ahamba ebhuqa amapholisa.
Ukupontshiswa kwezimota zabantu ngamapholisa yinto esihluphile elizweni njalo banengi abantu abaveze ukujabula ngokutshaywa kwamapholisa lokhu.
Isiphathamandla senhlanganiso yeChristian Alliance uMnu Useni Sibanda utshele iStudio 7 ukuthi udlakela phakathi kwamasotsha lamabutho yinto ebingakhangelelwanga njalo engamelanga yenzeke.
USibanda usole kakhulu Amapholisa ngokupontshisa izimota zabantu esithi lo ngumkhuba omubi omelet uphele ngokukhulu ukutshetsha.