UMongameli weMelika uMnu Joe Biden sethembise ukuvuselela ubudlelwano belizwe lakhe lamanye amazwe ukuze abambisane kumizamo yokuqeda ingxaki ezitshiyeneyo emhlabeni ezigoqela umkhuhlane weCovid-19.
Ekhuluma ekufungisweni kwakhe ngoLwesithathu, uBiden uthe iMelika izabuyela endaweni yayo yokukhokhela amazwe omhlaba isebenza lawo, hatshi ukwenza izinto izimele yodwa njengalokhu obekusenzakala phansi kombuso kaMnu Donald Trump.
UBiden uhle wabuyisela ilizwe lakhe kusivumelwano sokulwisana lokuguquka komkhathi eseParis Agreement lakunhlanganiso yezizwe zomhlaba ekhangelane lezempilakahle eyeWorld Health Organization lapho elalikhutshwe khona nguTrump.
Umbuzo obuzwa ngabanye ngothi kambe ubudlelwano phakathi kweMelika leZimbabwe buzaba njani phansi kombuso kaBiden, ikakhulu nxa kukhangela udaba lwezijeziso ezetheswa amalunga eZanu PF ngeleMelika.
“Kuhle ukuthi sibekwazi ukuthi amaAmericans ku-foreign policy policy yabo abatshintshi, ikakhulu kumumo wethu weZimbabwe,” kutsho ilunga leZanu PF uMnu Believe Gaule.
UMnu Gaule uqhubeke wathi kaboni uBiden esusa izijeziso lezi ngoba ungomunye weziphathamandla zeMelika ezazisungulayo ngesikhathi enguSenator eminyakeni phose engamatshumi amabili edluleyo.
Ocubungula ezombusazwe uMnu Mbuso Fuzwayo yena utshele iStudio 7 ukuthi laye kaboni iMelika isesula izijeziso lezi.
Kodwa uFuzwayo uthi lokhu akusoze kwenzeke ngesizatho sokuthi eleZimbabwe liqhubeka lihlukuluza abantu njalo lisephula amalungelo kazulu.
"Angiboni kusiba lenguquko eba khona ngoba iZimbabwe lilizwe elingakabi le-democracy, lilizwe elibuswa yizigebengu. Entweni ezafakwa yiZedera akula ngitsho lokukodwa esesikulungisile," kutsho uMnu Fuzwayo.
"Ngakho, ngibona angani ubudlelwano bethu leMelika abusoze buguquke kusikhatshana esilandelayo."
