URetired General Constantino Chiwenga uthi sokumele kuqunywe amanye amasimu abantu abansundu ukwenzela ukuthi abantu abanengi benelise ukulima amabele azanceda ilizwe leZimbabwe.
UChiwenga wethule lokhu ngoLwesithathu emhlanganweni wabalimi labosomabhizimusi eHarare ngesikhathi sombukiso weHarare Agricultural Show oqalise ngoMvulo.
Uthe ilizwe leZimbabwe lingaba lesivuno esingcono kungaba lamasimu amanengi kazulu.
Ugcizelele esithi uhulumende uphatheke kubi ngodaba lokuthi kulabanye abalamapulazi amanengi kulabanye abangela nsimu eyodwa.
“Lunye udaba oluqakathekileyo olufanele lulungisiswe kunotho yomhlabathi kuleli. Yikwandelwa kwendawo yokulima, ngalokho, uhulumende uphatheke kuhlelo lokukhangelisisa inani lensimu zokulima ejonge ukuthi aqume amanye amasimu amakhulu ukwenzela ukuthi andise isivuno ensimini ezingasetshenziswa ngamandla kanye lokuqeda udubo lokuthi umuntu oyedwa abe lamasimu amanengi.”
Owayengumongameli uMnu. Robert Mugabe wakhuthaza ukuthi abantu abansundu bathathele abamhlophe amapulazi ngomnyaka ka2002.
Banengi abamhlophe abalahlekelwa ngumhlabathi ngaphansi kohlelo lolu olwachothozwa kakhulu ngamabandla aphikisayo kanye labohulumende bakwamanye amazwe.
Kusenjalo, uChiwenga uphinde watshela abantu abasemhlanganweni lo owe Agribusiness ukuthi kumele osomabhizimusi lamabhanga aboleke abalimi imali yokulima.
Uthe lokhu kuzakwenza ukuthi kukhuphulwe isilinganiso sokuvunwa ngabalimi eZimbabwe.
