amalinks wokungena

Breaking News

Ama Mighty Warriors Athuthukisa Amathuba Okuyadibana Lentshantshu ze Africa


Iqembu leZimbabwe Mighty Warriors.

Iqembu labesifazane elimela ilizwe emdlalweni wenguqu elaziwa kakhulu ngegama elithi Mighty Warriors lithuthukise amathuba alo awokuyaphatheka kumidlalo eyokudinga intshantshu zezwekazi lase Africa ngemva kokunqoba ele Zambia nge 1 ka nya ngoLwesibili.

Iqembu le Mighty Warriors lihlohlelwe ngumgadli odlala elizweni le Spain uRutendo Makore ngehlandla lakuqala elomdlalo njalo limpumela ibeke leliqembu esimeni esihle esokuyadlala kumidlalo ye Total Women’s Africa Cup of Nationa ezaqhutshelwa elizweni lase Ghana ngoLwezi.

Umdlalo wangoLwesithathu ubungowehlandla lakuqala elesigaba sesibili njalo singesokucina esikudinga amaqembu azakuyaphatheka kulimidlalo eyokudinga intshantshu zezwekazi lase Africa.

Umdlalo wehlandla lesibili uzadlalwa kulimpelaviki ezayo esigodlweni iHarare mhla zilitshumi kunyanga kaNhlangula enkundleni yeRufaro.

Imvimbi yeqembu le Mighty Warriors uNobuhle Majika uthi bazaqedisa umsebenzi abawuqale namhla.

Kutsho uMajika: “Sizadlala ngokuzimisela okukhulu njalo asisoze sidelele. Indlela esibambene ngayo siliqembu akula ofuna ukuphoxa umqeqetshi ngemva komsebenzi omkhulu ongaka. Kumele sisebenze gadalala ngoba labo bazabuya bebophile befuna ukunqoba kodwa kithi abasoze balithole lelothuba.”

Amaqembu amathathu azaphutsha esendaweni ezintathu zakuqala kumncintiswano wokudinga intshantshu zezwekazi lase Africa ekupheleni komnyaka azathola ilungelo lokuyamela izwekazi leli kumncintiswano wokudinga intshantshu zomhlaba wonke jikelele ozaqhutshelwa elizweni lase France ngomnyaka ozayo.

Kweminye imidlalo edlalwe ngoLwesibili iqembu le Kenya linqobe ele Equatorial Guinea nge 2 ka 1 kuthi ele South Africa litshaye ele Lesotho nge 1 ka nya.

Kolunye udaba olufanayo iqembu labesilisa elimela ilizwe emdlalweni wenguqu lingqikilana lele Lesotho izolo ntambama emdlalweni wesigaba se semi – final kumncintiswano we COSAFA oqhutshelwa elizweni leSouth Africa.

Facebook Forum

XS
SM
MD
LG