amalinks wokungena

Breaking News

Amabandla Aphikisayo Athi Akuhluzwe Izivumelwano zeZimbabwe leChina


Umnumzana Tendai Biti
Umnumzana Tendai Biti

Lanxa eleChina leZimbabwe elobelane izivumelwano ezibiza amabillion amadollar awokuthuthukisa umnotho welizwe ukwethekelela kukaMongameli Xi Jinping kukhanya kungela okunengi okwazakalayo ngalezi zivumelwano lokuthi zilesisindo semali engakanani njalo kuziphi inhlelo ezizanceda uzulu.

Umkhokheli webandla le People’s Democratic Party (PDP) uMnumzana Tendai Biti labanye basole kakhulu ukungaphumi egcekeni kukahulumende ngalezi zivumelwano, okumenze wakhuthaza uzulu ukuthi engemukeli izivumelwano lezi.

Umhlangano webandla lePDP
Umhlangano webandla lePDP

Linkuthazo uBiti uyenze emhlanganweni lentathelizindaba, ekugqitshweni komhlangano wenkokheli yebandla lakhe owenzelwe eHarare ngoLwesine.

Ethi kumele abamabandla lozulu bafuqe uhulumende weZanu PF, ukuba ziyekwethulwa edale lephalamende, lezi zivumelwano njengalokho okutshiwo yisisekelo sombuso, zihluzisiswe kukhangelwa ukuthi ziphathisa uzulu na loba abalutshwana.

Owake waba yisiphathamandla laye kuhulumende womanyano, engumsekeli womkhokheli webandla le PDP, uMnumzana Samuel Siphepha Nkomo uthi ziyasolisa lezi zivumelwano ezilotshwe ngumongameli Robert Mugabe lomunye wakhe wakwele China, uMnumzana Xi Jinping.

Wengeza uNkomo ethi uzulu usemnyameni phezu kokwenza kwenkokheli ye China le, ethi kukhona akuchathamelweyo.

Umongameli Robert Mugabe elomongameli Xi Jinping wele China
Umongameli Robert Mugabe elomongameli Xi Jinping wele China

Uhambo luka Mongameli Xi Jinping wakwele China, leziphathamandla zakulelo lizwe, abe PDP bathi kufana lequla le Pioneer Column elalikhokhelwa nguCecil John Rhodes, okwaletha ukuhuquluzwa kwenotho yabensundu lokuncindezelwa kwabo okwadonsa iminyaka elikhulu.

Bathi, njengo Rhodes, uJinping uza kuleli ngesikhathi abelizwe lakhe besanelisa ukuthola imvumo yokuzithaphuzela kwezokwenjiwa kwamatshe aligugu njengalokho okwenziwa ngabequla elalikhokhelwa ngu Charles Rudd, ukubophela abensundu ku jogwe elinzima.

XS
SM
MD
LG